FLASH
Shkruar nga Pamfleti
Kombëtarja shqiptare e futbollit është vendosur sot në grupin B2 të Ligës së Kombeve, përkrah Çekisë, Ukrainës dhe Gjeorgjisë. Një short që duket i hapur për çdo mundësi për skuadrat, siç ka pranuar edhe trajneri i Ukrainës, Serhi Rebrov.
Ish-sulmuesi i njohur, i cili ka shënuar ndaj Shqipërisë në vitet e tij si futbollist në dy ndeshje të ndryshme në vitin 1997, duke sjellë fitoret 1-0 të Ukrainës në eliminatoret e Botërorit 1998, ka pranuar se ka ndjekur ndeshjet e kombëtares së drejtuar nga Silvinjo dhe ka vlerësuar paraqitjet e saj.
“Në fakt nuk prisja asgjë nga shorti i Ligës së Kombeve, pasi ne aktualisht po mendojmë për play-off e “EURO 2024”. Pas ndeshjeve të play-off, do të mbledhim informacione për të gjithë këto skuadra. Tani, mendoj se duhet të përqendrohemi te përgatitjet për ndeshjet e marsit.
Unë kam parë më shumë nga ndeshjet e Çekisë dhe Shqipërisë, më pak të Gjeorgjisë. Shqiptarët po tregojnë futboll solid, ata e kanë fituar të drejtën që të luajnë në Europian. Ashtu si edhe çekët, ashtu si edhe gjeorgjianët të cilët luajnë në play-off. Jam i sigurt se do të ketë një luftë të fortë në grupin tonë.
Po, aktualisht jemi të përqendruar te ndeshjet play-off, por mendoj se Liga e Kombeve është një turne i rëndësishëm. Të gjitha skuadrat kanë mundësinë të shkojnë në Europian nëpërmjet tij. Më përpara zhvilloheshin miqësore, por tani çdo skuadër ka ndeshje më të rëndësishme.
A do të jetë kjo një sfidë për t’u kthyer në Ligën A? “Po”, tha Rebrov pas shortit të Ligës së Kombeve.
Lini një Përgjigje