FLASH
Shkruar nga Pamfleti
FIFA po shqyrton mundësinë e forcimit të rolit dhe autoritetit të arbitrave përpara Botërorit të kësaj vere, me synimin për të reduktuar tërheqjet nga fanela të lojtarëve dhe situatat kaotike në zonën e penalltisë, veçanërisht gjatë goditjeve standarde.
Sipas të përditshmes britanike “The Times”, drejtuesit e arbitrimit në FIFA kanë zhvilluar diskutime për vendosjen e një qasjeje më të rreptë ndaj faulleve që ndodhin gjatë goditjeve të këndit dhe goditjeve të dënimit. Objektivi kryesor është garantimi i më shumë rregullit në momentet më problematike të lojës dhe shmangia e episodeve të debatueshme gjatë turneut.
Kjo linjë më e ashpër u është komunikuar tashmë trajnerëve të 48 kombëtareve pjesëmarrëse. Arbitrave pritet t’u kërkohet më pak tolerancë ndaj bllokimeve të portierëve dhe mbajtjeve nga fanela në zonë.
Mes propozimeve të diskutuara është edhe mundësia që skuadra sulmuese të përfitojë një goditje dënimi nëse një goditje këndi prishet nga një faull i kryer përpara zhvillimit të aksionit.
Ndërkohë, “International Football Association Board” (IFAB), institucioni përgjegjës për ndryshimet në rregullat e futbollit, pritet ta trajtojë këtë çështje në një perspektivë afatgjatë. Megjithatë, ndryshime zyrtare në rregullore nuk pritet të hyjnë në fuqi përpara nisjes së Botërorit.
FIFA synon të ndërhyjë në kohë për të shmangur që faza finale e turneut të shoqërohet nga polemika dhe vendime kontroverse në zonën e penalltisë, një problem që ka shkaktuar shpesh debate në kompeticionet ndërkombëtare.
Lini një Përgjigje