FLASH
Shkruar nga Pamfleti
Vllaznia i dha një tjetër leksion force dhe zemre Europës, duke përmbysur gjithçka në tokën letoneze. Pas humbjes 0-1 në Elbasan ndaj Dugavpils, skuadra shkodrane reagoi në mënyrën më të mirë të mundshme në ndeshjen e kthimit në Riga, duke fituar 2-4 dhe siguruar kalimin në turin e dytë kualifikues të Ligës së Konferencës.
Kuqeblutë e trajnerit Martini e nisën vrullshëm ndeshjen, duke kaluar në epërsi me golin e Mensah në minutën e 22’. Por vetëm pak minuta më vonë, vendasit tronditën me dy gola të shpejtë, duke përmbysur momentalisht fatin e takimit.
Megjithatë, shpirtin garues të kësaj skuadre nuk e ndali as presioni dhe as rezultati. Në fundin e pjesës së parë, ishte Yago ai që solli barazimin 2-2 dhe riktheu shpresën. Në pjesën e dytë, gjithçka u kthye në spektakël shqiptar: Dodaj shënoi golin e tretë në minutën e 74’, duke çuar rezultatin e përgjithshëm në 3-3, ndërsa në minutën e 87’, ishte Mala që i vuri kapakun një kualifikimi të merituar.
Tashmë Vllaznia do të përballet me fituesin e çiftit Vikingur Reykjavik – Malisheva në turin tjetër. Nëse Malisheva arrin përmbysjen e saj në kthim, do të kemi një përballje emocionuese shqiptare në arenën ndërkombëtare – një derbi që do të ndezë edhe më shumë atmosferën e Ligës së Konferencës.
Për Vllazninë, kjo është më shumë se një kualifikim; është rikthimi i krenarisë dhe shenjë e ambicies europiane.
Lini një Përgjigje