FLASH
Shkruar nga Pamfleti
Kosova ka marrë fitoren e dytë radhazi në Ligën e Kombeve. “Dardanët” kanë mposhtur në transfertë Lituaninë me rezultatin 1-2 dhe janë ngjitur në vendin e parë së bashku me Rumaninë.
Skuadra e drejtuar nga Franko Foda zhbllokoi rezultatin në minutën e 20. Aksion i mrekullueshëm nga Edon Zhegrova, që falë dhe asistit të Muslijës, lëshoi një goditje të pakapshme në portë. Kjo ishte dhe gjuajtja e parë e takimit. Lituania barazoi në minutën e 34 me Gineitis, por goli u anulua nga VAR për pozicion jashtë loje.
Me avantazhin e një goli u mbyll edhe pjesa e parë e takimit. Në minutën e 65, Kosova gjeti edhe golin e sigurisë me Ermal Krasniqin që dhuroi spektakël. Ky ishte dhe goli i parë te Kosova për Krasniqin, që shfrytëzoi si duhet pasimin e Rashicës.
Në minutën e 84, Lituania ngushtoi diferencën. Golubickas shënoi pas një gabimi në mbrojtjen e Kosovës, por goli i tij vlejti vetëm për statistikë.
Me këtë fitore, Kosova ngjitet në vendin e parë në Grupin 2 të Ligës C me 6 pikë, po aq sa Rumania që ka një ndeshje më pak, ndërsa Lituania mban vendin e fundit me 0 pikë.
Ndeshjen e ardhshme, Kosova do ta luajë të martën më 15 tetor në “Fadil Vokrri” kundër Qipros në orën 20:45.
Lini një Përgjigje