FLASH
Shkruar nga Pamfleti
Pas skandalit të ndeshjeve të trukura që tronditi basketbollin në Kosovë, tashmë kanë nisur edhe arrestimet. Mediat kosovare raportojnë se Drejtoria e Krimeve Ekonomike të Policisë së Kosovës ka kryer dje një aksion, duke arrestuar në Prizren arbitrin Daut Mehmeti dhe trajnerin Arbnor Rifati.
Pas skandalit, gjyqtari Mehmeti u përjashtua përjetësisht nga FIBA dhe Federata e Kosovës. Policia e Kosovës pritet të japë detaje më të hollësishme në lidhje me këto dy arrestime, ndërsa dyshja janë në paraburgim. Urdhër-kontrolli është zhvilluar me qëllim të sigurimit të dëshmive shtesë dhe arrestimin e dy të dyshuarve në lidhje me veprën penale ‘kurdisje e ndeshjes ose sportit’, ndërsa citohen edhe aktiviteti i Ligës Unike, event i përbashkët mes Shqipërisë dhe Kosovës.
“I dyshuari i parë (arbitër me licencë ndërkombëtare), dyshohet të ketë kurdisur ndeshjet e basketbollit në kuadër të Super ligës së Kosovës, Ligës Unike Kombëtare dhe Ligës Ballkanike, veprimet i ka kryer në bashkëveprim me të dyshuarin e dytë (trajner basketbolli). Të dyshuarit i kanë kryer këto veprime me qëllim të përfitimit material. Po ashtu, i dyshuari i parë, ka bashkëvepruar edhe me arbitra dhe trajnerë ndërkombëtarë në kurdisjen e lojërave basketbollistike, me qëllim të fitimit të basteve”, thuhet në njoftimin e policisë. Të dyshuarve pas marrjes në pyetje me urdhër të Prokurorit të Prokurorisë Themelore në Prishtinë, u është komunikuar masa e ndalimit prej 48 orëve.
Lini një Përgjigje