FLASH
Shkruar nga Xavier Abu Eid
FIFA e ka humbur qartë pavarësinë në vendimmarrje si organizatë sportive ndërkombëtare dhe ka hequr dorë nga përgjegjësia e saj për ta mbajtur politikën larg futbollit...
Ky edicion i Kupës së Botës e ka vënë gjithnjë e më shumë FIFA-n dhe drejtuesit e saj nën vëzhgim. Vendimi për të hequr pezullimin e një futbollisti amerikan, pas ndërhyrjes së presidentit të SHBA-së, Donald Trump, ka shkaktuar reagime të forta mes tifozëve në mbarë botën. Ndërkohë, janë ngritur akuza se gjyqtarët kanë favorizuar Argjentinën me vendimet e tyre gjatë ndeshjeve kundër Egjiptit dhe Kepit të Gjelbër.
Ajo ka refuzuar vazhdimisht kërkesat e Shoqatës Palestineze të Futbollit (PFA) për pezullimin e Shoqatës Izraelite të Futbollit (IFA), për shkak se kjo e fundit lejon zhvillimin e ndeshjeve të kampionatit të saj në tokë palestineze të pushtuar, ku luajnë skuadra me bazë në vendbanime të paligjshme.
FIFA nuk ka dënuar vrasjet masive dhe gjymtimin e futbollistëve palestinezë, as nuk ka kërkuar lirimin e lojtarëve të arrestuar, së fundmi Rand Halawani dhe Natalie Abu Dayyeh, anëtare të ekipit kombëtar palestinez të futbollit të femrave. FIFA jo vetëm që ka toleruar dhe normalizuar racizmin, aparteidin dhe pushtimin, por ka marrë pjesë edhe në përpjekjet për të lavdëruar përfshirjen e futbollistëve izraelitë në krimet e luftës në Gaza dhe Liban.
Pavarësisht vendimeve të përsëritura të Gjykatës Ndërkombëtare të Drejtësisë dhe rezolutave të ndryshme të OKB-së, FIFA vazhdon të pretendojë se kërkesat palestineze janë "një çështje shumë komplekse sipas së drejtës ndërkombëtare publike" dhe se "statusi përfundimtar juridik i Bregut Perëndimor mbetet i pazgjidhur". Kjo nuk është gjë tjetër veçse përvetësim i argumenteve izraelite, të mbështetura edhe nga administrata Trump, për të mbrojtur aleatin e saj, Izraelin, dhe për të legjitimuar përvetësimin e tokës palestineze.
Ashtu siç Izraeli ka përdorur turizmin, arkeologjinë, fenë, bujqësinë dhe fusha të tjera për të normalizuar aneksimin e paligjshëm të territoreve palestineze, ai ka vepruar njësoj edhe përmes futbollit, me mbështetjen e FIFA-s. Kontributi i FIFA-s në këto politika është thelluar gjatë presidencës së Gianni Infantinos. Organizatat e të drejtave të njeriut ia kanë referuar veprimet e Infantinos Gjykatës Ndërkombëtare Penale, duke e akuzuar se ka vepruar "me vetëdije të plotë se këto praktika përbëjnë shkelje të të drejtave të njeriut, aparteid dhe krime lufte", si edhe se ka injoruar raportet dhe letrat e shumta të dërguara mbi këtë çështje.
Drejtuesit e FIFA-s jo vetëm që kanë qëndruar të heshtur dhe pasivë përballë krimeve të Izraelit dhe përfshirjes së IFA-së, por kanë marrë pjesë aktive edhe në fshehjen e tyre. FIFA nuk është më një federatë sportive ndërkombëtare neutrale, e cila, sipas statutit të saj, duhet të shmangë çdo ndërhyrje politike. Ajo është shndërruar në një instrument politik që mbështet politikën e jashtme të SHBA-së dhe të aleatëve të saj.
Vetë Infantino është një shembull i qartë i këtij realiteti. Në vitin 2018, pa ndonjë arsye të dukshme, ai mori pjesë në ceremoninë e nënshkrimit të Marrëveshjeve të Abrahamit në Uashington, një marrëveshje që synonte ta hiqte çështjen palestineze nga axhenda e përbashkët arabe. Në vitin 2021, ai mori pjesë në një konferencë të organizuar nga gazeta izraelite e krahut të djathtë Jerusalem Post, e mbajtur në një vend të ndërtuar mbi varrezat myslimane të përdhosura të Mamillahut në Jerusalem.
Në shkurt, Infantino mori pjesë në inaugurimin e "Bordit të Paqes", i cili synon t'i japë fund përfshirjes së OKB-së në çështjen palestineze dhe të pengojë çdo përpjekje ligjore ndërkombëtare për t'i dhënë fund pushtimit dhe gjenocidit izraelit. Ai madje njoftoi një "partneritet strategjik për të nxitur rimëkëmbjen dhe paqen përmes futbollit" me këtë bord.
Polemikat e vazhdueshme rreth organizimit të Kupës së Botës duhen parë në këtë kontekst. FIFA e ka humbur qartë pavarësinë në vendimmarrje si organizatë sportive ndërkombëtare dhe ka hequr dorë nga përgjegjësia e saj për ta mbajtur politikën larg futbollit.
Kur u pyet për shkeljet që SHBA-ja ka kryer si vend organizator ndaj futbollistëve, gjyqtarëve dhe tifozëve, Infantino u tha të pranishmëve se duhet të "qetësohen" dhe "të relaksohen".
E gjithë kjo është jashtëzakonisht e dëmshme për besimin e publikut te organizata ndërkombëtare si FIFA. Po ashtu, dëmton futbollin ndërkombëtar dhe reputacionin e tij si një sport gjithëpërfshirës. Nëse Infantino nuk ndryshon rrënjësisht kursin e tij, trashëgimia që do të lërë pas do të jetë shkatërrimtare./Përshtati “Pamfleti” nga “Aljazeera”
Lini një Përgjigje