FLASH
Shkruar nga Pamfleti
Klubi i Egnatias përballet me një situatë të pazakontë në prag të një prej ndeshjeve më të rëndësishme të sezonit. Pas një vendimi disiplinor nga Federata Shqiptare e Futbollit (FSHF), i gjithë stafi teknik është pezulluar, duke krijuar një precedent të rrallë në futbollin shqiptar.
Sipas burimeve pranë klubit, vendimi i Disiplinës ka sjellë pezullimin në bllok të stafit teknik të Egnatias. Ky zhvillim vjen vetëm pak ditë përpara përballjes me Elbasanin, një rival direkt në garën për titullin kampion.
Në kushte të tilla, lind çështja e drejtimit të skuadrës gjatë ndeshjes. Tradicionalisht, në raste të ngjashme, klubet zgjedhin një trajner nga akademia ose ekipi i dytë për të mbuluar mungesat në pankinë.
Megjithatë, burimet bëjnë të ditur se Egnatia po shqyrton një vendim të pazakontë: të paraqitet në ndeshje pa asnjë drejtues teknik në pankinë. Ky veprim pritet të jetë njëkohësisht edhe një formë proteste ndaj vendimit të organit disiplinor.
Në pankinë pritet të jenë vetëm pjesëtarët e stafit mjekësor, konkretisht doktori i ekipit, Ervin Karafili, dhe përgatitësi atletik Andri Babaj, për të garantuar mbarëvajtjen fizike të lojtarëve gjatë ndeshjes.
Nëse ky skenar konfirmohet, skuadra do të drejtohet praktikisht nga vetë lojtarët në fushë, pa orientim të drejtpërdrejtë taktik nga një trajner. Kjo mund të ndikojë ndjeshëm në performancën e ekipit, sidomos duke pasur parasysh rëndësinë e përballjes për fatin e sezonit.
Lini një Përgjigje