FLASH
Shkruar nga Pamfleti
Një hetim i BBC Global China Unit ka nxjerrë në dritë një fenomen alarmant që prek privatësinë e mijëra qytetarëve në Kinë: përdorimin masiv të kamerave të fshehta në dhomat e hoteleve për të regjistruar pamje intime të klientëve, të cilat më pas transmetohen në platforma online për përfitime financiare.
Rasti konkret i publikuar nga BBC lidhet me një burrë të identifikuar me pseudonimin “Eric”, i cili në vitin 2023 zbuloi rastësisht se ai dhe partnerja e tij ishin filmuar pa dijeninë e tyre gjatë një qëndrimi në një hotel në Shenzhen. Pamjet ishin shpërndarë në kanale online dhe ishin ndjekur nga mijëra përdorues, vetëm pak javë pas qëndrimit të tyre në hotel.
Sipas hetimit, regjistrimet realizohen përmes kamerave shumë të vogla të fshehura në dhomat e hotelit, të cilat janë të lidhura drejtpërdrejt me sisteme transmetimi “live”.
BBC raporton se disa faqe interneti dhe aplikacione, të promovuara kryesisht përmes platformës Telegram, pretendojnë se menaxhojnë mbi 180 kamera aktive të instaluara në hotele të ndryshme në të gjithë Kinën.
Edhe pse ligjet kineze ndalojnë rreptësisht prodhimin dhe shpërndarjen e materialeve pornografike, ky fenomen ka ekzistuar prej vitesh dhe, sipas BBC-së, është përshkallëzuar së fundmi për shkak të zhvillimit teknologjik dhe përdorimit masiv të rrjeteve sociale.
Në përpjekje për ta frenuar këtë praktikë, autoritetet kineze miratuan në prill të vitit të kaluar rregullore të reja që detyrojnë hotelet të kryejnë kontrolle periodike për pajisje të fshehta filmimi. Megjithatë, hetimi tregon se masat nuk kanë qenë të mjaftueshme.
BBC identifikoi mijëra video të reja të regjistruara në dhoma hotelesh, ndërsa vlerëson se numri i personave të filmuar pa dijeni mund të jetë shumë më i lartë, duke u bazuar në fluksin e zakonshëm të klientëve në këto ambiente.
Skandali ngre shqetësime serioze mbi sigurinë, privatësinë dhe dështimin e mekanizmave të kontrollit, duke rikthyer në vëmendje rrezikun real që përballet çdo person gjatë qëndrimit në hotele.
Lini një Përgjigje