FLASH
Shkruar nga Pamfleti
Ka mjaftuar vetëm një foto e Alketa Vejsiut me Ledion Liçon që rrjeti të nisë të ziejë. Jo për nostalgji, por për pyetjen që sot po qarkullon më shumë se vetë Big Brother: pse bashkë dhe pse tani?
Ka fjalë që konfirmojnë se Alketa Vejsiu do të shfaqet sonte në Big Brother në rolin e opinionistes. Por, si çdo lëvizje e fortë televizive, edhe kjo vjen e mbështjellë me mjegull:
A do të zëvendësojë për një natë Monika Kryemadhin, apo Arbër Hajdarin?
Apo do të jetë në panel me të dy?
Madje, nuk përjashtohet as skenari më i bujshëm: një performancë krah Ledion Liços, duke e bërë të pushojë pak, siç bëri me Amadeusin në San Remo. Nëse kjo ndodh, mesazhi është i qartë: Alketa nuk hyn kurrë në skenë për të qëndruar në sfond. Madje, ka zëra që thonë se Alketa mund të drejtojë Big Brother-in në edicionin e ardhshëm, pasi Ledioni ka vendosur të tërhiqet nga formati.
Dikur, një shfaqje e tillë do të ishte e paimagjinueshme. Alketa: simbol i Klan-it, Ledioni: fytyra e Top Channel. Dy botë paralele që sot duken se po afrohen më shumë se kurrë.
Rastësi? Vështirë të besohet.
Në një kohë kur audienca nuk ndahet më nga ekrani, por nga rrjetet sociale, kufijtë mes televizioneve duken më fleksibël se kurrë. Aleancat nuk shpallen, por shihen. Dhe kjo shfaqje e përbashkët, qoftë edhe për një natë, ka peshë simbolike: ekranet mund të jenë rivale, por figurat janë gjithnjë në qarkullim.
Në këtë mozaik intrigash, rikthehet edhe Arbana Osmani. Miqësia e saj publike me Ben Blushin nuk kaloi pa u vënë re, sidomos deklarata e këtij të fundit se e kishte zgjedhur vetë Arbanën si prezantuese të Big Brother, sepse “ishte përfundimisht më e mira”.
Por historia ka edhe anën e padukshme:
Arbana ka qenë e ftuar në emisionin e Alketës, i ka çuar një projekt televiziv… që nuk u pranua nga Klan-i. Rastësi apo një “jo” që peshon ende?
Pas intervistës me Blushin, Ledioni dhe Alketa shfaqen bashkë. Mesazhi duket i nënkuptuar: televizioni nuk harron, por di të ripozicionohet.
Në prapaskenë qëndron edhe një tjetër përplasje e fortë: ajo mes Alketës dhe Olsa Muhametit, autores së Big Brother Kosova. Një sherr i madh, i vjetër dhe kurrë i sqaruar publikisht.
Ironia? Sot, shumëkush mendon se Big Brother Kosova është më tërheqës se ai i Shqipërisë. Më shumë histori, më shumë tension, më shumë “telenovela”.
Në fund të ditës, pyetja mbetet:
A është Big Brother ende një lojë mes banorëve, apo një lojë pushteti mes figurave televizive?
Alketa sonte nuk hyn thjesht si opinioniste. Ajo hyn si simbol, si mesazh dhe si kujtesë se televizioni shqiptar ka më shumë prapaskena sesa prime-time. Dhe ndoshta, për këtë arsye, publiku po e ndjek me më shumë interes dramën jashtë shtëpisë sesa brenda saj.
Sepse në Big Brother, si gjithmonë, loja më e fortë nuk luhet para kamerave, por pas tyre. /Pamfleti
Lini një Përgjigje