FLASH
Shkruar nga Pamfleti
Elon Musk nuk mban më për momentin statusin e njeriut të parë në histori që ka arritur një pasuri neto mbi 1 trilion dollarë. Rënia e vlerës së aksioneve të kompanive të tij, SpaceX dhe Tesla, ka bërë që pasuria e miliarderit amerikan të zbresë në rreth 957 miliardë dollarë.
Sipas Bloomberg Billionaires Index, humbja vjen pas një jave të trazuar në tregje, ku aksionet e SpaceX pësuan luhatje të forta dhe humbën një pjesë të konsiderueshme të fitimeve të regjistruara pas debutimit në bursë.
Musk kishte hyrë në histori si personi i parë që kaloi kufirin e 1 trilion dollarëve, pasi vlera e SpaceX u rrit ndjeshëm në treg, duke e çuar përkohësisht pasurinë e tij mbi 1.1 trilion dollarë.
Në të njëjtën kohë, edhe Tesla është përballur me presion në bursë. Aksionet e prodhuesit të automjeteve elektrike ranë me afro 5.8%, ndërsa investitorët po tregohen më të kujdesshëm ndaj sektorit teknologjik për shkak të pritshmërive për rritje të normave të interesit në Shtetet e Bashkuara.
Pavarësisht kësaj tkurrjeje të pasurisë, Musk vazhdon të mbetet personi më i pasur në botë. Në listën e miliarderëve ai ndiqet nga themeluesi i Amazon, Jeff Bezos, si dhe bashkëthemeluesit e Google, Larry Page dhe Sergey Brin.
Analistët vlerësojnë se luhatjet e fundit nuk ndryshojnë pozicionin dominues të Musk në renditjen globale të pasurisë, por tregojnë se edhe rekordet më të mëdha financiare mund të ndryshojnë brenda pak ditësh për shkak të zhvillimeve në tregjet e kapitalit.
Lini një Përgjigje