FLASH
Shkruar nga Pamfleti
Ka nisur takimi i thirrur nga presidentja e Kosovës, Vjosa Osmani, me përfaqësues të partive politike, vetëm pak orë pasi ajo shpërndau Kuvendin dhe shpalli mbajtjen e zgjedhjeve të reja parlamentare.
Në këtë takim nuk është i pranishëm kryeministri dhe njëherazi kryetari i Lëvizjes Vetëvendosje, Albin Kurti. Në qendër të diskutimeve mes presidentes dhe përfaqësuesve politikë pritet të jetë caktimi i datës së zgjedhjeve të parakohshme.
Në takim mungojnë gjithashtu edhe partitë më të vogla që janë pjesë e koalicionit qeverisës me Vetëvendosjen. Ndërkohë, ftesës së presidentes i janë përgjigjur disa nga liderët e opozitës, mes tyre Bedri Hamza, kryetar i Partisë Demokratike të Kosovës (PDK), Lumir Abdixhiku, kryetar i Lidhjes Demokratike të Kosovës (LDK), si dhe Ramush Haradinaj, kryetar i Aleancës për Ardhmërinë e Kosovës (AAK), së bashku me përfaqësues të partive të tjera opozitare më të vogla.
Ndërkohë, Lëvizja Vetëvendosje pritet ta dërgojë në Gjykatën Kushtetuese dekretin e presidentes Osmani për shpërndarjen e Parlamentit. Shefja e grupit parlamentar të kësaj partie, Arbërie Nagavci, e cilësoi vendimin si një akt të paprecedentë, duke deklaruar se me këtë veprim është cenuar rendi kushtetues i vendit.
Lini një Përgjigje