FLASH
Shkruar nga Pamfleti
Ministri i Mbrojtjes së Serbisë, Millosh Vuçeviç ka kërcënuar hapur Kosovën gjatë një konference për media këtë të hënë, duke folur mbi një hyrje të mundshme të trupave serbe në Kosovë.
Vuçeviç ka deklaruar se nëse Forcat e Armatosura të Serbisë marrin urdhër nga presidenti Vuçiç që njësitet e tyre të hyjnë në Kosovë, ata do ta bëjnë në mënyrë efikase dhe profesionale.
Por ai shtoi se nëse një gjë e tillë ndodh, atëherë do të merret leje paraprakisht nga komanda e KFOR.
Ai po ashtu ka kërkuar prani më të madhe të KFOR në territorin e Kosovës, veçanërisht në zonat me shumicë serbe.
Vuçeviç shtoi se bashkëpunimi i Ministrisë së Mbrojtjes serbe e Ushtrisë Serbe me misionin e KFOR-it është i mirë dhe funksionon në përputhje me Rezolutën 1244 dhe Marrëveshjen Teknike Ushtarake nga Kumanova.
“Bashkëpunimi bazohet në respektin reciprok dhe po zhvillohet në mënyrë korrekte. Republika e Serbisë beson se KFOR-i duhet të ketë një rol sa më domethënës në Kosovë, veçanërisht në zonat ku jeton popullata serbe. Ne nuk kemi asgjë kundër pranisë së KFOR-it në komunitetet tona, as serbët që jetojnë në krahinën jugore”, tha ai.
Ministri theksoi se Ushtria Serbe e konsideron të nevojshme rritjen e pranisë së njësive të këtij misioni, para së gjithash në zonat ku jetojnë serbët, pasi kjo do të përmirësonte sigurinë e popullit serb në Kosovë.
Duke u ndalur tek rritja e pranisë së Forcave të Armatosura serbe në kufi me Kosovën, Vuçeviç i cilësoi lajmet si të pavërteta.
Ndërsa Shefi i Shtabit të Përgjithshëm, gjenerali Milan Mojsiloviç, në konferencën për shtyp bashkë me ministrin e Mbrojtjes, refuzoi provat e prezantuara nga Kosova dhe nuk ngurruan të distancoheshin nga veprimet e Milan Radojçiç, organizatorit të sulmit të armatosur të 24 shtatorit.
Megjithatë ai konfirmoi se ushtria po trajnon disa serbë të Kosovës si rezervistë.
“Milan Radoiçiç nuk ka marrë pjesë në stërvitjen në livadhet e Pasuljanskit, nuk ka gjuajtur asnjë plumb apo granatë dhe nuk ka marrë pjesë në ndonjë aktivitet. Në disa raste në vitet e kaluara ai ishte ftuar në stërvitje, por ai nuk iu përgjigj atyre dhe ajo që Radoiçiç bën në pronën e tij private nuk është punë e ushtrisë serbe. I mohoj me vendosmëri të gjitha akuzat nga Prishtina”, tha Mojsiloviç.
Lidhur me sulmin e armatosur në Banjskë të Zveçanit, foli edhe drejtori i të ashtuquajturës zyrë për Kosovën në qeverinë serbe, Petar Petkoviç, duke pretenduar se njëri prej sulmuesve është vrarë nga policia e Kosovës pasi ishte plagosur.
Ai akuzoi autoritetet e Kosovës për falsifikim provash dhe kërkoi nga KFOR-I dhe EULEX-I që të jenë objektivë dhe neutralë sa i përket sulmit të 24 shtatorit.
Lini një Përgjigje