FLASH
Shkruar nga Pamfleti
Komisioni Qendror i Zgjedhjeve ka rifilluar procesin e verifikimit të formularëve zgjedhorë dhe numërimin e votave për kandidatët në 11 komuna të Kosovës. Sipas zëdhënësit të KQZ-së, Valmir Elezi, ky proces po zhvillohet në: Prishtinë, Pejë, Prizren, Podujevë, Mitrovicë e Jugut, Gjakovë, Malishevë, Lipjan, Gjilan, Ferizaj dhe Suharekë.
Sipas të dhënave zyrtare, deri më tani janë procesuar mbi 2,009 nga gjithsej 2,557 vendvotime, ose më shumë se 78.57% e totalit. Kjo tregon një progres të konsiderueshëm në përmbylljen e numërimit dhe publikimin e rezultateve përfundimtare.
Ndërkohë, në 27 komuna të tjera procesi është përmbyllur plotësisht. Këto përfshijnë: Mamushë, Shtërpcë, Junik, Hani i Elezit, Kllokot, Partesh, Mitrovicë e Veriut, Novobërdë, Zveçan, Viti, Zubin Potok, Ranillug, Dragash, Istog, Obiliq, Gllogoc, Deçan, Shtime, Klinë, Kamenicë, Fushë Kosovë, Leposaviq, Graçanicë, Vushtrri, Rahovec, Skënderaj dhe Kaçanik – duke përfshirë në total 1,033 vendvotime.
Ky proces është vendimtar për garantimin e transparencës dhe besueshmërisë së zgjedhjeve, në një klimë politike që kërkon vërtetësi dhe respekt të vullnetit qytetar. Pamfleti do të vijojë ndjekjen e zhvillimeve të mëtejshme në terren.
Lini një Përgjigje