FLASH
Shkruar nga Pamfleti
Partia Demokratike e Kosovës ka deklaruar se do të pranojë çdo datë për mbajtjen e zgjedhjeve të parakohshme që do të caktohet nga presidentja Vjosa Osmani.
Pas takimit konsultativ me presidenten për përcaktimin e datës së zgjedhjeve, kryetari i PDK-së Bedri Hamza u shpreh se partia që ai drejton nuk ka një datë të preferuar për zhvillimin e procesit zgjedhor.
Sipas tij, PDK do të mbështesë çdo datë që do të vendosë presidentja, për sa kohë ajo është në përputhje me afatet ligjore dhe kushtetuese.
“Ne e dimë që janë dërguar disa shkresa në Kushtetuese, se si do t’i trajtojë gjykata. Çdo vendim që merret nga gjykata e respektojmë. Besoj që presidentja e ka analizuar mirë veprimet e veta. Megjithatë vendimi i Kushtetueses është i pranueshëm për PDK-në. Cilado datë që caktohet nga presidentja e vendit në përputhje me afatet kushtetuese”, tha Hamza duke shtuar se përgjegjësia kryesore për dërgimin e vendit në zgjedhje të reja bie mbi VV-në.
Ai bëri të ditur gjithashtu se gjatë takimit është diskutuar edhe për mundësinë e përcaktimit të datës së zgjedhjeve të ardhshme.
“Diskutuam edhe për mundësinë e datës së organizimit të zgjedhjeve të ardhshme. S’ka pasur asnjë arsye me ardh në këtë moment. Përgjegjësia kryesore i bie partisë më të madhe sepse ka mundur t’i japë vendit president. Zgjedhja e presidentit historikisht ka ndodhur me marrëveshje politike në të gjitha periudhat. Nuk kam vendosur asnjëherë vija të kuqe. Nuk kemi qenë refuzues. Qëllimi ka qenë që vendi të ketë institucione e të mos vazhdohet me këto bllokada”, u shpreh Hamza.
Lini një Përgjigje