FLASH
Shkruar nga Pamfleti
Pas publikimit të artikullit nga ‘Pamfleti’, një ditë më parë me titull “1000 fëmijë rrezikohen në një shkollë në Mitrovicë; autoritetet kosovare heshtin!”, kanë reaguar institucionet.
Shkolla “Ismail Qemali” në Mitrovicë rrezikon të shembet, ndonëse objekti ishte inauguruar vetëm pesë vite më parë si një institucion arsimor model dhe rreth 2 milionë euro ishin investuar në të nga fondet e Bashkimit Evropian...
Lidhur me sigurinë e nxënësve si pasojë e dëmtimeve të mureve, rrjedhjes së ujit nga kulmi, lagështisë dhe dëmeve të tjera, prindërit paralajmëruan një protestë për sot, ku së bashku me fëmijët e tyre do të dilnin në rrugë për të vetëdijesuar shtetin lidhur me rrezikun që u kanosej jetës së rreth 1000 nxënësve.
Kjo mënyrë e zgjedhur e reagimit të prindërve ka frikësuar institucionet që ende po tentojnë ta mbajnë të fshehur këtë skandal. Madje, për ndërprerjen e mësimit që prej tri javësh pa prezencë fizike në këtë shkollë nuk ka reaguar as Ministria e Arsimit, tek e cila komuna e Mitrovicës e ka hedhur topin e përgjegjësisë për keqpërdorimet gjatë ndërtimit.
Drejtoria Komunale Arsimore (DKA) ka nxjerrë sot një njoftim ku informon se mësimi online do të vazhdojë vetëm edhe dy ditët e ardhshme, ndërsa pas pushimit pranveror pritet zgjidhje adekuate.
“Drejtoria e Arsimit, në takimin e sotëm të mbajtur me menaxhmentin e shkollës, Këshillin Drejtues dhe Këshillin e Prindërve të shkollës "Ismail Qemali", analizoi hapat e ndërmarrë nga të gjithë mekanizmat dhe raportet e ekipeve profesionale deri në këtë fazë, në lidhje me gjendjen e objektit të shkollës dhe shqyrtoi të gjitha mundësitë e organizimit të procesit edukativo-arsimor me prezencë fizike pas përfundimit të pushimit pranveror”, thuhet në komunikatën e komunës së Mitrovicës.
Sipas këtij njoftimi, gjatë javës së pushimit pranveror do të njoftohen të gjithë nxënësit dhe prindërit për detajet e organizimit të mësimit me prezencë fizike.
Kryetarja e Këshillit Drejtues të shkollës, Suada Koxhadish Saraçi konfirmoi për ‘Pamfleti’-n se pas pushimit pranveror pritet që nxënësit të zhvendosen përkohësisht në një objekt tjetër shkollor, derisa të merret një përgjigje për gjendjen e objektit nga ekspertët e pavarur.
Me gjithë gjendjen alarmante në këtë shkollë, krerët e shtetit të Kosovës nuk kanë reaguar ende. Asnjë hetim nuk ka nisur nga organet ligjzbatuese.
Siç ka raportuar ‘Pamfleti’, jetët e këtyre nxënësve janë mbrojtur vetëm nga KFOR-i, pjesëtarë të të cilit kanë rekomanduar prindërit që të mos lejonin fëmijët e tyre të futeshin më në këtë objekt shkollor, për shkak të rrezikshmërisë së lartë të shembjes nga dita në ditë. /Pamfleti
Lini një Përgjigje