FLASH
Shkruar nga Pamfleti
Autoritetet e Kosovës kanë gjetur ditën e sotme mbetje mortore që dyshohet se i përkasin një personi të zhdukur gjatë luftës së Kosovës në vitet 1998-1999, gjatë gërmimeve në një zonë në Rahovec.
Sipas Komisionit Qeveritar për Persona të Zhdukur, mbetjet u gjetën dhe u zhvarrosën gjatë gërmimeve në Përzhina të Rahovecit, ditën e premte pasdite. Këto janë ditët e treta me radhë të gërmimeve në këtë zonë, rreth 60 kilometra larg Prishtinës.
Gjatë tri ditëve të fundit, autoritetet kanë gjetur në përgjithësi mbetje mortore që i përkasin dy personave, si dhe dy pjesë kockore. Të gjitha mbetjet janë dërguar për ekzaminim në Institutin e Mjekësisë Ligjore, në përputhje me procedurat ligjore dhe standardet forenzike.
Komisioni thekson se mbetjet mortore të zhvarrosura mund t’i përkasin viktimave që janë ende në Listën e Personave të Zhdukur. Kohët e fundit autoritetet kanë kryer gërmime të vazhdueshme në vende të ndryshme ku dyshohet se mund të jenë të zhdukur personat gjatë luftës.
Kujtojmë se gjatë luftës së viteve 1998-1999, rreth 13.000 njerëz humbën jetën, ndërsa mbi 1.500 persona vazhdojnë të jenë të zhdukur.
Lini një Përgjigje