FLASH
Shkruar nga Pamfleti
Ekziston rreziku i përshkallëzimit të konfliktit edhe në pjesë të tjera të Ballkanit Perëndimor, duke përfshirë Bosnje-Hercegovinën...
Tre dekada pas shpërbërjes së përgjakshme të Jugosllavisë, armiqësitë etnike që ndezën konfliktin vazhdojnë. Kosova shpalli pavarësinë e saj nga ish-republika jugosllave, Serbia, në vitin 2008, por Serbia refuzon ta pranojë pavarësinë. Pushtimi rus i Ukrainës i shtoi një dimension të ri konfliktit. Tashmë tensionet në rritje ndërmjet autoriteteve në Kosovë dhe pakicës serbe lokale atje, kanë sjellë dhunën më të keqe ndër vite.
Kosova ka një popullsi kryesisht shqiptare etnike prej 1.8 milionë banorësh, por ajo përfshin më shumë se 100,000 serbë. Në gusht të vitit 2022, autoritetet u përpoqën të detyronin pakicën serbe që të ndryshonin targat e makinave dhe dokumentet personale.
Shumë serbë etnikë e shihnin rendin administrativ si një fyerje dhe një kërcënim për identitetin e tyre. Autoritetet përfundimisht ranë dakord të mos zbatonin planin, por një numër i madh i policëve serbë në veri të Kosovës u larguan në shenjë proteste. Pas arrestimit të tre oficerëve vitin e kaluar, anëtarët e komunitetit u përgjigjën duke protestuar dhe bllokuar rrugët. Kryeministri i Kosovës Albin Kurti akuzoi Serbinë për nxitje të trazirave. Presidenti serb Aleksandar Vuçiç ngriti mundësinë e dërgimit të trupave në Kosovë për të mbrojtur pakicën serbe. Në maj, protestuesit serbë u përpoqën të bllokonin kryebashkiakët e sapozgjedhur etnikë shqiptarë që të arrinin në zyrat e tyre në qytetet me shumicë serbe, duke çuar në përleshje në të cilat u plagosën dhjetëra paqeruajtës të udhëhequr nga NATO, si dhe më shumë se 50 serbë vendas.
Ndarjet gjeopolitike mbi Kosovën janë bërë më të mprehta që nga pushtimi i plotë i Ukrainës nga Rusia. Putin ka kritikuar Perëndimin për ato që ai thotë se janë standarde të dyfishta ndaj Serbisë. Ai e ka krahasuar kauzën e Kosovës – e cila është njohur nga shumica e botës perëndimore – me atë të dy rajoneve në Ukrainën lindore të kontrolluara nga separatistët e mbështetur nga Rusia që nga viti 2014. Nga ana tjetër, liderët e Serbisë dhe Kosovës e kanë përdorur luftën në Ukraina, për të intensifikuar retorikën e tyre. Ekziston rreziku që një përshkallëzim mund të përhapet në pjesë të tjera të Ballkanit Perëndimor të paqëndrueshëm, duke përfshirë Bosnje-Hercegovinën. NATO, forca e paqes me afro 3,800 trupa në Kosovë, ka ndihmuar në ruajtjen e paqes në Kosovë për vite me radhë dhe ka thënë se është e gatshme të ndërhyjë nëse kërcënohet stabiliteti.
Kurti i Kosovës ka akuzuar Serbinë se i shërben interesave ruse, ndërsa Vuçiç i Serbisë ka thënë se zyrtarët e Kosovës po përpiqen të shfrytëzojnë alarmin mbi Ukrainën për qëllimet e tyre.
SHBA në përgjithësi ka më shumë ndikim se BE-ja mbi udhëheqjen e Kosovës, ndërsa Serbia kërkon mbështetje nga Moska, si dhe nga Uashingtoni dhe Brukseli në trajtimin e mosmarrëveshjes. Vuçiç ka dënuar në Kombet e Bashkuara pushtimin e Ukrainës, ndërsa nuk ka pranuar sanksionet e BE-së kundër Rusisë. Në vitin 2022, Vuçiç siguroi edhe pesë vite të tjera si president, me partinë e tij që mban shumicën në parlament. Refuzimi i Kurtit për të bërë ndonjë lëshim ndaj Serbisë ka komplikuar çdo bisedë me kombin fqinj. /Përshtati “Pamfleti” nga “Bloomberg”
Lini një Përgjigje