FLASH
Shkruar nga Pamfleti
Të premten, Kuvendi do të zhvillojë një nga mbledhjet më të rëndësishme të muajve të fundit, ku Këshilli për Rregulloren, Mandatet dhe Imunitetin do të shqyrtojë kërkesën e SPAK për autorizimin e arrestimit të zëvendëskryeministres Belinda Balluku. Burime zyrtare konfirmojnë se deputetët e opozitës do të marrin pjesë normalisht në këtë mbledhje, pavarësisht masave disiplinore të kërkuara ndaj tyre.
Një orë më parë pritet të mblidhet edhe Sekretariati i Etikës, ku shumica socialiste ka kërkuar dënimin e 29 deputetëve të opozitës pas tensioneve të krijuara në seancën plenare të së enjtes. Por pezullimet eventuale nga Etika nuk kanë fuqi për të ndaluar pjesëmarrjen e tyre në Këshillin e Mandateve, pasi ato vlejnë vetëm për seancat plenare dhe mbledhjet e komisioneve.
Ndërkohë, në mbledhjen e Këshillit do të paraqiten edhe përfaqësues të SPAK, përfshirë prokurorin e çështjes Dritan Prençi, prokuroren Dorina Bejko dhe kreun e ri të SPAK, Klodian Braho, i cili do të ketë përballjen e parë institucionale në detyrë.
Ndaj Belinda Ballukut është vendosur tashmë masa e ndalimit për dalje jashtë shtetit, ndërsa Gjykata e Posaçme ende nuk ka vendosur për pezullimin nga detyra, pasi pritet vendimi i Gjykatës Kushtetuese mbi ankimimin e paraqitur nga kryeministri Rama, i cili do të shqyrtohet më 22 janar.
Lini një Përgjigje