FLASH
Shkruar nga Pamfleti
Ministri i Brendshëm Taulant Balla ka reaguar për ngjarjen tepër të rëndë në Shkodër, ku një grua dyshohet se është mbytur në Bunë së bashku me tre fëmijët e saj, për shkak të dhunës dhe presionit që i shkaktohej nga bashkëshorti.
Me anë të një postimi në rrjetin social, “Facebook”, Balla bëri thirrje se çdo grua duhet ta denoncojë dhunën, për të cilën nuk ka justifikim.
“Ngjarja e rëndë në Shkodër, ku një nënë dhe tre fëmijët e saj dyshohet se janë vetëmbytur në lumin Buna, na ka tronditur të gjithëve. Njësia e specializuar e RENEA dhe Forca Kombëtare e Sigurisë Publike janë duke vijuar kërkimin e përgjatë gjithë rrjedhës së lumit Buna. Policia e Shtetit ka ndaluar bashkëshortin dhe ka dyshime të forta se dhuna në familje, presioni psikologjik kanë shtyrë viktimën drejt këtij akti tragjik.
Gjej rastin t’i bëj thirrje çdo gruaje të denoncojë çdo lloj forme dhune. Dhuna shpesh manifestohet në shtëpi, mbrapa dyerve të mbyllura, por kjo është një temë që duhet bërë publike. Dhuna ndaj grave nuk është një çështje private. Ajo na intereson të gjithëve. Dhe ne, e gjithë shoqëria, duhet t’i nxisim viktimat e dhunës ta denoncojnë. Nuk mund të ketë #AsnjëJustifikim ndaj dhunës – as në shtëpi, as në vendin e punës, as në jetën publike, as online. Askund!”, shkruan Balla.
Lini një Përgjigje