FLASH
Shkruar nga Pamfleti
Rama nuk e lëshon Olta Xhaçkën, i beson Njësinë nr.2 në kryeqytet...
Nuk ka qetësi në radhët e Partisë Socialiste. Përveç drejtuesve politikë, Edi Rama ka vendosur të bëjë rokadë edhe në radhët e niveleve më të ulëta, duke lëvizur deputetët që kanë qenë përgjegjës në zona të caktuara.
Majko iku nga Kukësi dhe u soll në Tiranë, ku ju besua zona e Kavajës. Po ashtu një lëvizje e madhe ishte largimi i Erion Braçes pas shumë vitesh në Divjakë. Ai kaloi si përgjegjës te Njësia 5 në Tiranë.
Por këto nuk janë lëvizjet e vetme. Sipas informacioneve në Selinë Rozë, Rama ka vendosur të largojë Olta Xhaçkën nga Kolonja dhe ta sjellë në Tiranë. Mësohet se ajo do të drejtojë fushatën në Njësinë numër 2 në Tiranë.
Akoma nuk janë të qarta lëvizjet e Ramës, por ka dy gjëra: Ose kryeministrit nuk i dalin llogaritë në kryeqytet dhe po e përqendron betejën këtu, ose emrat që po lëviz nuk i duan më te zonat e tyre.
Tirana është qarku ku këtë herë beteja do të jetë e zjarrtë, pasi në lojë janë dhe partitë e reja, të cilat pretendojnë të marrin mandate. Në bazë të sondazheve, si partia e Qorit, ajo e Lapajt, apo dhe partitë e Shabanit dhe Shehajt, kuotohen në nivele të kënaqshme për të marrë mandate në kryeqytet. Kjo do të thotë se PS mund të rrudhet dhe Rama po i sjell të gjithë këtu.
Por kjo ka dhe të keqen tjetër, pasi Tirana ka dhe numrin më të madh të deputetëve te lista e hapur. Kjo do të thotë se shumë emër të njohur do e gjejnë veten aty dhe shanset që të mbeten jashtë Parlamentit janë të mëdha.
Ndërkohë mbetet ende habi se si Rama vijon ta promovojë Olta Xhaçkën. Kjo e fundit është nën hetim nga SPAK për aferat me pronat e ushtrisë. Burri i saj po ashtu. Megjithatë kryeministri vijon të mos e lëshojë. Pasi shkeli hapur Kushtetutën për mandatin e saj, duket se sërish po jep sinjale se do ta fusë te lista e kandidatëve. /Pamfleti
Lini një Përgjigje