FLASH
Shkruar nga Pamfleti
Ambasadori i Britanisë në Shqipëri, Alastair King-Smith ia ka bërë thirrje qeverisë dhe institucioneve të ndërmarrin hapa më të mëdha për të luftuar korrupsionin.
Ambasadori theksoi se korrupsioni në vendin tonë vazhdon të depërtojë sektorët publikë dhe privatë në shoqëri.
“Shqipëria duhet ta pranojë se korrupsioni vazhdon të depërtojë sektorët publikë dhe privatë në shoqëri dhe të ndërmarrë hapa më të mëdha për t’iu kundërvënë. Jo sepse partnerët ndërkombëtare si ne janë të shqetësuar, por sepse kjo është thelbësore për vetë zhvillimin e Shqipërisë.", tha King-Smith.
Këto deklarata ambasadori i bëri në konferenca me temë “Forcimi i Llogaridhënies: Fuqizimi i Përpjekjeve Kundër Korrupsionit në Ballkanin Perëndimor” që u organizuar nga Ministria e Drejtësisë dhe Ministri i Shtetit për Administratën Publike dhe Anti-Korrupsionin, në bashkëpunim me Iniciativën Globale kundër Krimit të Organizuar Ndërkombëtar, me mbështetjen e Qeverisë së Mbretërisë së Bashkuar.
Më tej Smith nënvizoi se lufta kundër korrupsionit mbetet një përpjekje e përbashkët dhe u bëri thirrje të gjithë aktorëve që t'i vendosin institucionet e pavarura në qendër të reformave të mëtejshme.
“Dhe ne duhet të garantojmë, ndërkohë që reforma në drejtësi vazhdon, të jenë vetë institucionet të inkurajuar si aktorë të pavarur, të formëzojnë fazën tjetër. Angazhimi, krahas këtyre institucioneve në reformën e mëtejshme duhet të konsiderohet me shumë kujdes ose mund të rrezikojë të dëmtojë përparimin që është bërë. I inkurajoj institucionet të paraqesin propozimet për fushat që ata kërkojnë më shumë mbështetje ose ku shohin se ndryshimet mund të zgjerojnë, jo kufizojnë shtetin e së drejtës”- Alastair King-Smith.
Alastair King-Smith iu bashkua përfaqësuesve nga institucionet qeverisëse, organeve të drejtësisë penale, organizatave ndërkombëtare, akademikëve dhe shoqërisë civile për të trajtuar objektivat e përbashkëta të luftës kundër korrupsionit dhe kulturës së pandëshkueshmërisë si dhe forcimit të llogaridhënies.
Lini një Përgjigje