FLASH
Shkruar nga Pamfleti
Me një situatë katastrofike opozitare ku Ilir Meta është i kyçur në qeli ndërsa Sali Berisha në shtëpi dhe zgjedhjet janë vetëm 6 muaj larg, ky i fundit shfrytëzoi një pyetje të gazetarëve për ti çuar Ilir Metës një mesazh të kriptuar në qelinë e burgut.
“Do e ndihmoni Metën duke i siguruar lista të sigurta për kandidatët në zgjedhje?”, u pyet Berisha në një konferencë për mediat.
Berisha e la të hapur mundësinë e përfshirjes së kandidatëve të Partisë së Lirisë në listat e Partisë Demokratike, por nuk dha një “po” definitive, apo edhe simbolike qoftë.
“Çështja e koalicionit është e hapur. PD qëndron e hapur ndaj aleatëve të vet. Meta është i burgosur politik”, theksoi Berisha.
Në pamje të parë, kjo përgjigje ngjan me stilin e politikanit që përgjigjet duke mos thënë asgjë.
Por në kontekstin politik të momentit, kjo përgjigje e Berishës nuk është pa përgjigje.
Dhe Ilir Meta e di këtë. Kjo deklaratë e Berishës për të është si një sfidë që kujton se negociatat për listat sapo kanë filluar sepse status kuo-ja ndryshoi. Marrëveshja e dyshuar si e arritur më parë për një listë të përbashkët PD-PL ka rënë.
Pas mesazhit, Berisha rinisi refrenin e javës së fundit me akuza ndaj qeverisë.
Berisha u pyet edhe për protestën e së martës të opozitës, e cila pritet të paralizojë qarkullimin në vend.
Ai tha se kjo protestë nuk do t’i kthehet në bumerang opozitës pasi po luftohet pikërisht për të drejtat e çdo qytetari.
"Po luftojmë për të drejtat, dinjitetin dhe lirinë e çdo qytetari që beson te vota e lirë dhe funksionimi i ligjit e Kushtetutës," deklaroi Berisha.
Sipas tij, Shqipëria pa opozitë është një katastrofë, ndërsa qeverinë e Edi Ramës e cilësoi si një regjim të urryer antishqiptar.
Lini një Përgjigje