FLASH
Shkruar nga Pamfleti
Me kërkesë të SPAK, Gjykata e Posaçme Antikorrupsion (GJKKO) ka pushuar çështjen ndaj Lulzim Berishës dhe Plaurent Dervishajt për vrasjen e biznesmenit Vajdin Lame.
Kjo është hera e dytë që Prokuroria e Posaçme vjen me kërkesë për pushimin e çështjes, me argumentin se nuk ka prova që implikojnë këta dy persona në vrasjen e Lames.
Herën e parë, trupa e gjykimit i ktheu kërkesën prokurores Elida Kaçkini, duke kërkuar nga kjo e fundit hetime shtesë.
Akuza ndaj Lulzim Berishës dhe Plaurent Dervishaj u ngrit pas dëshmisë së bashkëpunëtorit të drejtësisë Luftar Reçi. Ky i fundit i hapi probleme emrave të njohur të botës se krimit, që vepronin kryesisht në Tiranë, Durrës e Vlorë.
Disa vite më parë, në tre rrëfime, Reçi rrëfeu disa ngjarje kriminale duke përfshirë emra te njohur për drejtësinë.
Vajdin Lame, presidenti i Federatës së Boksit dhe truproja e tij Artan Arsi u vranë në 27 shkurt të vitit 2005, në njërën nga kullat pas stadiumit “Qemal Stafa”.
Lame dhe Arsi u ekzekutua me një sasi eksplozivi e cila ishte vendosur ne ashensorin e pallatit ku jetonte Vajdin Lame.
Ky i fundit vdiq në vend ndërsa Artan Arsi ndërroi jetë rrugës për spital.
Për ngjarjen e shkurtit të vitit 2005, janë marrë të pandehur Emiljano Shullazi, Indrit Rusi, Viktor Ymeri dhe Indrit Taullai.
Lini një Përgjigje