FLASH
Shkruar nga Pamfleti
Një ngjarje tragjike ka ndodhur këtë mbrëmje në Gramsh, pasi 4 persona dyshohet se janë mbytur në liqenin e Banjës. Viktima dyshohet se kanë mbetur një 46 vjeçar me dy djemtë tij, përkatësisht 19 dhe 14 vjeç, si dhe nipi i tij, 20 vjeç.
Kanë qenë familjarët e tyre ata që kanë njoftuar forcat e rendit, pasi 4 personat në fjalë kishin shkuar për tu larë në liqen, por nuk kanë arritur të dalin dot.
Në drejtim të liqenit janë nisur polumbarët e forcave RENEA për të bërë të mundur gjetjen dhe nxjerrjen e katër shtetasve nga liqeni. Në breg të liqenit janë gjetur dy motoçikleta, tre celularë dhe rrobat e tyre të trupit.
“Rreth orës 19:00, Salla Operative e Komisariatit të Policisë Gramsh ka marrë një telefonatë se 4 shtetas dyshohet se janë mbytur në Liqenin e Hidrocentralit të Banjës. Menjëherë kanë shkuar shërbimet e policisë, grupi hetimor dhe zjarrfikësit, ku ka rezultuar se:
Në Liqenin e Hidrocentralit të Banjës në fshatin Drizë të Gramshit, dyshohet se shtetasit A.Z, rreth 46 vjeç, R.Z, 19 vjeç, E.Z, 14 vjeç , (babai me dy djemtë) dhe kushëriri i tyre shtetasi M.Z, 20 vjeç, sipas deklarimeve të familjarëve janë futur në liqen për tu larë dhe nuk kanë dalë më.
Gjithashtu menjëherë në drejtim të liqenit janë nisur polumbarët e Reneas për të bërë të mundur gjetjen dhe nxjerrjen e katër shtetasve nga liqeni.
Grupi hetimor ka gjetur në buzë të liqenit dy motoçikleta, tre celularë dhe teshat e trupit.
Në drejtimin e Prokurorisë, grupi hetimor vijon punën në vendngjarje për sqarimin dhe dokumentimin e plotë të rrethanave të ngjarjes”, njofton policia.
Deri tani dyshimet janë se të katër personat janë mbytur dhe policia po kryen kërkime përgjatë gjithë bregut të liqenit për gjetjen e trupave.
Lini një Përgjigje