FLASH
Shkruar nga PamfletiAntimafia shkatërron kartelin e narkotrafikut Shqipëri-Itali, që operonte në disa rajone të jugut të vendit fqinj dhe qarkullonte 3,5 mln euro drogë në vit. Hetimet nisën që nga viti 2020, fillimisht u sekuestruan sasi të vogla, valutë e konsiderueshme cash dhe pasuri të patundshme, që çuan tek kokat e organizatës dhe çmontimin e saj.
Detaje të reja janë zbardhur nga një megaperacion i Antimafias italiane në rajonin e Barit (Pulja) që çoi në goditjen e një karteli narkotrafiku të linjës Shqipëri-Itali, me të paktën 28 persona të dyshuar dhe që bëhej me anë të rrugës detare.
Hetuesit shpjeguan në një konferencë për shtyp sesi droga, e cilësuar si “shumë e pastër”, mbërriti në Itali nëpërmjet anijeve të peshkimit, që niseshin nga Shqipëria. Por nacionalitetet e të ndaluarve dhe hetuarve nuk u publikuan për momentin, ashtu sikurse as emrat e tyre.
Drejtoria e Hetimit Antimafia njoftoi mbrëmjen e djeshme (23 Shtator) se po zbaton urdhrin e Gjykatës, me kërkesë të Drejtorisë së Rrethit Antimafia, ndaj 12 personave (11 në burg dhe 1 në arrest shtëpie) të hetuar me vepra të ndryshme penale.
Organizata që ka edhe 15 persona të tjerë nën hetim në gjendje të lirë, akuzohet për trafikimin e sasive të mëdha të kokainës në zonën e Foggia dhe provincën e saj, në Bat, në Molise të Poshtme dhe në Abruzzo.
“Hetimet - sipas gjetjeve të DIA - bënë të mundur dokumentimin dhe mbledhjen e provave, sipas të cilave midis korrikut 2020 dhe nëntorit 2021, organizata shpërndau mbi 20 kilogramë kokainë të pastër, ekuivalente me mbi 83,000 doza në tregun e paligjshëm dhe me një fitim rreth 6.6 milionë euro”, shkruan “La Gazzetta Del Mezzogiorno”.
Gjatë hetimeve, të dyshuarve iu sekuestruan mbi 10 kg lëndë narkotike, ekuivalente me rreth 45,000 doza, e karakterizuar nga një shkallë pastërtie shumë e lartë, mesatarja e së cilës, pas analizave laboratorike, rezultoi midis 42,59% dhe '87,04%. Gjithashtu dhe dy bomba të bëra vetë, me potencial sulmues vdekjeprurës, thekson ANSA.
Në operacionet e mëparshme, ku u kapën fijet e grupit, janë sekuestruar edhe 100 gramë hashash, pasuri të paluajtshme dhe të luajtshme, me një vlerë të përgjithshme prej rreth 200 mijë euro njërit prej të dyshuarve.
Qarkullimi i organizatës ishte të paktë rreth 3,5 milionë euro në vit sipas provave të kapura deri tani. Arrestimeve që po kryhen aktualisht i është shtuar edhe sekuestrimi i pasurisë së grumbulluar në mënyrë të paligjshme nga të dyshuarit, përfshi edhe kompani investimi apo llogari rrjedhëse mbi mbi 600 mijë euro cash, të cilës i shtohet sekuestrimi i shtatorit 2022.
15 të dyshuarve të tjerë u është dorëzuar ftesa për t'u paraqitur pranë gjyqtarit hetues të Gjykatës së Barit, për pyetje parandaluese dhe hetim në gjendje të lirë, deri në gjetjen e provave të reja.
“Prokurori publik i DDA, Ettore Cardinali, vuri në dukje papërshtatshmërinë e këtyre procedurave të reja në rastin konkret të krimit të organizuar, duke sugjeruar se një qasje më tradicionale mund të garantonte një efektivitet më të madh në arrestimin dhe ndalimin e figurave të përfshira në organizatën mafioze”, shkruan media “occhioche.it”.
Gjithashtu u shpjegua se metoda e dërgimit të drogës nga Shqipëria me anije peshkimi tregon rëndësinë e lidhjes mes grupeve kriminale.
Prokurori Roberto Rossi shprehu gjithashtu shqetësime për rrezikun e mundshëm të arratisjes ose ndërhyrjes në prova nga të dyshuarit, duke pasur parasysh se disa njerëz në rrezik arrestimi tani kanë akses në informacione të ndjeshme rreth procedimeve.
Lini një Përgjigje