FLASH
Shkruar nga Pamfleti
Ditën e sotme në GJKKO po vijojn seanca gjyqësore për dosjen e bujshme “Plumbi i Artë”, ku i penduari i drejtësisë, Nuredin Dumani, ka dhënë dëshmitë e tij lidhur me ngjarje të ndryshme kriminale.
Gjatë seancës së kësaj të enjteje, avokatët patën mundësinë ta pyesin Dumanin mbi aktivitetin dhe lidhjet e tij me grupe kriminale ndërsa dëshmoi dhe mbi grabitjen e një argjendari në qytetin e Elbasanit.
Pjesë nga dëshmia:
Ku u diskutua plani për grabitjen?
Dumani: “Plani u bisedua në shtëpinë e Talo Çelës, e cila ndodhet pranë servisit të Gentian Sharrës. Shtëpia ishte dykatëshe me çati dhe në atë kohë nuk kishte portë, por vetëm rrjetë.”
Si ishte viktima dhe si u krye grabitja?
Dumani: “Viktima ishte trupmbushur dhe më i gjatë se unë. Grabitja u krye në orën 07:00-08:00 të mëngjesit, gjatë një dite me shi. I morëm dy çanta, një blu e errët ose e zezë, nuk e mbaj mend saktë.”
A e mësuat emrin e viktimës?
Dumani: “Nuk e kam fiksuar, pasi nuk më interesonte.”
Çfarë kishte brenda çantave?
Dumani: “Në çanta kishte bizhuteri të ndryshme, mbi 30 ora dhe rreth 8.3 kg ar, pa llogaritur orët. Pas grabitjes, shkuam në shtëpinë e Talo Çelës dhe i zbrazëm sendet në papafingo. Hoqëm çantat për të shmangur ndonjë pajisje GPS.”
Si u larguat nga vendngjarja?
Dumani: “Atë ditë kishim një ‘Benz 2500’ me ngjyrë blu të errët. Shkuam dhe u kthyem me të njëjtën makinë. Po ashtu, kishim dhe dy mjete të tjera, një ‘Rover 75’ dhe një tjetër ‘Benz 2500’.”
Çfarë ndodhi me çantat e grabitura?
Dumani: “Çantat i hoqi Talo Çela, por nuk e di se ku i çoi.”
Çfarë veshje kishit ditën e grabitjes?
Dumani: “Nuk e mbaj mend.”
Si ndodhi momenti i grabitjes?
Dumani: “Ilirjan Feçi mori çantën dhe situata na doli pak jashtë kontrollit, pasi nuk donim ta vrisnim viktimën.”
A pati përplasje fizike me viktimën?
Dumani: “Nuk pati kohë për konflikt, pasi ai u godit me levë.”
Kush ndodhej në makinë gjatë kthimit nga vendngjarja?
Dumani: “Në mjet ishim unë, Ilirjan Feçi, Gentian Sharra dhe Talo Cela.”
Lini një Përgjigje