FLASH
Shkruar nga Pamfleti
Portet holandeze janë kthyer në një nga magazinat kryesore të drogës, veçanërisht kokainës që vjen nga Amerika Latine. Betejat për epërsinë e bandave janë të ashpra dhe situata shihet më e rëndë në Amsterdam. Ai është kthyer në portin kryesor të futjes së kokainës dhe ka një luftë të madhe mes bandave për dominimin e tij. Pjesë e kësaj luftë janë edhe bandat shqiptare, të cilat përdorin portet holandeze për të sjellë kokainë nga Ekuadori dhe vende të tjera. Rrjeti britanik “The Guardian”, ka publikuar një artikull, në të cilin kryebashkiakja e Amsterdamit Femke Halsema, jep alarmin mbi atë që po ndodh aty dhe kërkon të merren masa.
Qytetarët e Holandës e panë "luftën kundër drogës" ndërkombëtare me njëfarë përbuzjeje. Shteti është i butë ndaj drogave të lehta si kanabisi, duke lejuar përdorimin personal në kushte të caktuara. Drogat e forta janë teknikisht të paligjshme, por mbajtja e sasive të vogla (si gjysmë gram droga të forta ose një pilulë e vetme ekstazi) shpesh nuk ndiqet penalisht. Në të kaluarën ka pasur krime droge, madje edhe vrasje, por tregtia e drogës nuk ka ndikuar në ekonominë dhe jetën e përditshme të qytetarëve. Megjithatë, kjo nuk është më kështu. E nxitur nga globalizimi dhe kriminalizimi ndërkombëtar i drogës, tregtia ilegale e drogës është bërë më fitimprurëse dhe më e dhunshme, dhe efektet janë katastrofike.
Në dekadën e fundit, Roterdami, porti më i madh në Evropë , është bërë "zemra" e tregtisë së kokainës. Autoritetet holandeze kanë shtuar përpjekjet për të luftuar trafikimin, por nuk e kanë kthyer rrjedhën. Të dhënat e fundit tregojnë një rritje rekord në sasinë e kokainës së sekuestruar, nga pak më shumë se 22,000 kilogramë në gjysmën e parë të 2022 në 29,702 kilogramë në gjysmën e parë të vitit 2023, shkruan “The Guardian”.
Me rritjen e tregtisë së drogës, shqetësimi është shtuar, sepse fëmijët 14 vjeç janë “tërhequr” në këtë tregti të paligjshme. Me rritjen e shumave të sekuestruara, u rrit edhe dhuna. Në pesë vitet e fundit, tre figura kryesore në një çështje të madhe penale kundër bandave të drogës, janë vrarë në mes të ditës në Amsterdam: vëllai i një dëshmitari kryesor, avokati i tij dhe një gazetar i njohur.
Amsterdami është bërë një destinacion kryesor për bosët e drogës për të pastruar paratë e tyre ose për t'i dërguar ato në parajsat fiskale. Paratë e tyre hyjnë në ekonominë legale, veçanërisht në pasuri të paluajtshme. Nëse kjo prirje vazhdon, ekonomia holandeze do të vërshohet nga paratë e krimit dhe dhuna do të arrijë kulmin e saj. Kjo çon në përçarje sociale, breza të rinjsh do të joshen në krim dhe sundimi i ligjit do të shkatërrohet. Pa ndryshime thelbësore, Holanda rrezikon të bëhet një narko-shtet. Vlera e përllogaritur e prodhimit vjetor të ekstazisë në Holandë është 18.9 miliardë euro.
Lufta kundër drogës
Në mënyrë që Holanda të zgjidhë problemet e saj të drogës, ajo duhet të ndryshojë qasjen e saj aktuale. Alternativat e luftës ndaj drogës duhet të diskutohen urgjentisht në qeveritë lokale, parlamentet kombëtare dhe veçanërisht në asambletë ndërkombëtare. Ndalimi i drogës është i sanksionuar në traktatet ndërkombëtare që kufizojnë hapësirën për politikat kombëtare të drogës, që do të thotë se do të duhet të krijohen aleanca të reja ndërkombëtare që kanë prioritet shëndetin dhe sigurinë mbi masat ndëshkuese.
Ka shumë shembuj historikë që mund të ndihmojnë në gjetjen e alternativave në luftën kundër drogës. Që nga fillimi i viteve 1980, futja e objekteve për reduktimin e dëmit në Holandë, si zonat e furnizimit me metadon dhe përdorimit të drogës për personat e varur nga heroina, ka përmirësuar kushtet e tyre të jetesës, shëndetin dhe cilësinë e jetës, ndërsa krimi është ulur. Kryeqyteti i Zvicrës, Berna, këtë verë ka shpallur procedime ligjore për shitjen legale të kokainës, me qëllim rritjen e kontrollit dhe masave parandaluese. Kjo pasoi fillimin e një gjyqi për shitjen legale të kanabisit në qytet. Një shembull tjetër i shkëlqyer është Uruguai, ku qeveria ka legalizuar kanabisin për përdorim rekreativ, mjekësor dhe industrial dhe ka krijuar një treg të rregulluar për kanabisin, me rregulla strikte për prodhimin, shpërndarjen dhe shitjen.
Rregullimi i tregut, monopolet shtetërore apo ofrimi i shërbimeve për qëllime mjekësore janë vetëm disa nga alternativat e mundshme. Por asnjëra prej tyre nuk ofron zgjidhje “të çastit”. Kriminelët kanë treguar se do të përdorin dhunën për të mbrojtur fitimet e tyre dhe rreziqet shëndetësore të disa drogave janë ende të mëdha. Kjo do të thotë se edhe shteti duhet të ketë parasysh reagimin. Megjithatë, asnjë nga këto nuk mund të jetë një justifikim për të mos bërë diçka për të. /Përshtatur nga “The Guardian”
Lini një Përgjigje