FLASH
Shkruar nga Pamfleti
Administratori i një call-centre në Elbasan ka rënë në prangat e policisë. Në kuadër të operacionit policor të koduar "Pending call", u arrestua në flagrancë shtetasi Mirsad Nokiçi, 26 vjeç, si dhe ka nisur procedimi penal për 4 shtetas të tjerë, të punësuar si operatorë në këtë subjekt.
"Specialistët e Seksionit për Hetimin e Narkotikëve të DVP Elbasan dhe strukturat operacionale të Komisariatit të Policisë Elbasan, si rezultat i hetimeve proaktive dymujore, në drejtimin e Prokurorisë së Elbasanit dhe me mbështetjen e inteligjencës informative, për një rast mashtrimi nëpërmjet një subjekti call center, kanë organizuar dhe finalizuar operacionin policor të koduar "Pending call". Në kuadër të këtij operacioni, është arrestuar në flagrancë shtetasi M. N., 26 vjeç, banues në Tiranë, si dhe janë referuar materialet në Prokurori ku ka nisur procedimi në gjendje të lirë për shtetasit R. Sh., 27 vjeç, I. K., 26 vjeç, E. B., 28 vjeç dhe N. S., 24 vjeç, të katërt banues në Elbasan.
Nga veprimet hetimore ka rezultuar se këta 5 shtetas, nëpërmjet një subjekti call center (me administrator shtetasin M. N. dhe operatorë 4 shtetasit e proceduar), në lagjen "Sul Paprri", Elbasan, mashtronin shtetas të huaj, në mënyrë që ata të investonin para në tregje fiktive. Në ambientet e subjektit call center janë gjetur nga shërbimet e Policisë, 3 kompjutera, 1 laptop, 2 USB dhe 6 aparate celulare, të cilat u sekuestruan në cilësinë e provës materiale, së bashku me një sasi të vogël lënde të dyshuar narkotike kanabis që iu gjet shtetasit N. S."-thuhet në njoftimin e policisë.
Materialet procedurale i kaluan Prokurorisë pranë Gjykatës së Shkallës së Parë Elbasan, për veprime të mëtejshme.
Lini një Përgjigje