FLASH
Shkruar nga Pamfleti
Zbardhen detaje të reja nga operacioni i Guardia di Finanza në Umbria dhe Peruxhia, ku autoritetet italiane kanë goditur një organizatë kriminale shqiptare të përfshirë në trafikun ndërkombëtar të kokainës.
Me gjashtë arrestimet e fundit, numri i personave të ndaluar ka shkuar në 13, mes tyre edhe dy gra. Njëra prej tyre është bashkëshortja e drejtuesit të dyshuar të kartelit, e cila sipas hetimeve përdorej si pjesë e skemës për të mos tërhequr vëmendjen e forcave të rendit.
Hetuesit kanë zbuluar se kreu i organizatës, gjatë transportit të sasive të mëdha të kokainës, shoqërohej shpesh nga bashkëshortja dhe djali i tij i mitur, duke krijuar imazhin e një familjeje të zakonshme. Takimet dhe shkëmbimet e drogës zhvilloheshin kryesisht në parkingje qendrash tregtare, ku prania e familjes shërbente si kamuflim për aktivitetin kriminal.
Sipas autoriteteve italiane, organizata kishte bazën operative në Foligno, ndërsa vepronte në disa rajone të Italisë dhe kishte lidhje me klanet e Camorrës në Napoli. Grupi drejtohej nga persona me bazë në Dubai dhe Shqipëri, të cilët koordinonin transportin dhe shpërndarjen e lëndëve narkotike në territorin italian.
“Shoqata u zbulua se kishte bazën e saj operative në Foligno, degë në rajone të ndryshme të Italisë dhe kontakte me individë të tjerë nga Safe-Zone me kombësi shqiptare dhe italiane, me bazë në Perugia, si dhe në provincat e Romës, Barit dhe Napolit, ku u gjetën lidhje me klanet kryesore të Camorra-s. Promovuesi i shoqatës organizoi, në emër të krerëve të bandës, me bazë në Dubai dhe Shqipëri, transportimin e sasive të mëdha të narkotikëve, të cilat i kaloi në disa celula aktive në pjesën më të madhe të territorit kombëtar”, njoftuan autoritetet italiane sot.
Hetimi nisi pas sekuestrimit të 65 kilogramëve kokainë në janar të vitit 2025 dhe çoi në zbulimin e një rrjeti të strukturuar kriminal. Gjatë veprimeve hetimore u dokumentuan rreth 40 episode të trafikut të drogës, me një sasi totale prej mbi 200 kilogramësh kokainë.
Për të shmangur përgjimet, anëtarët e grupit përdornin ekskluzivisht telefona të koduar, të njohur si “kriptofonë”, të cilët mund të kontrolloheshin dhe fshiheshin në distancë.
Në një prej operacioneve, Guardia di Finanza sekuestroi rreth 25 kilogramë kokainë të fshehur në një ndarje sekrete të ndërtuar poshtë dyshemesë së një automjeti. Gjithashtu u gjetën 55 mijë euro cash, një armë e vjedhur dhe disa pajisje telefonike të koduara.
Pakot e drogës mbanin logo të markave të njohura si “Ferrari” dhe “Lacoste”, të përdorura për identifikimin e ngarkesave brenda rrjetit kriminal.
Lini një Përgjigje