FLASH
Shkruar nga Pamfleti
Mjafton një kërkim i vogël në mediat sociale për të kuptuar se çfarë po ndodh. Nga njëra anë, Manastirliu shfaqet me një bllok në dorë duke mbledhur ankesat e qytetarëve, më pas shfaqet duke takuar grupet e interesit, ndërsa njerëzit e mandatuar të Berishës mbledhin strukturat dhe përpiqen t'i bindin ata të punojnë në mbështetje të Binaj të pavarur...
Gjykata Kushtetuese pezulloi mbajtjen e zgjedhjeve të pjesshme në Tiranë më 9 nëntor, pas një apeli nga kryetari i bashkisë Erion Veliaj, i cili u shkarkua nga detyra nën kujdesin e veçantë të Kryeministrit Edi Rama.
Gjykata Kushtetuese ka njoftuar një seancë dëgjimore publike më 31 tetor dhe, pavarësisht vendimit, ajo që dihet me siguri është se zgjedhjet nuk do të mbahen në Tiranë më 9 nëntor. Sipas Kodit Zgjedhor, periudhat kur mund të mbahen zgjedhjet lokale janë nga 15 prilli deri më 15 maj ose nga 15 tetori deri më 15 nëntor.
Kodi parashikon që rastet e parashikuara në pikat 5, 6, 7 dhe 8 të nenit 9 të këtij ligji janë përjashtime nga ky rregull. Dhe duke iu referuar secilës pikë të Kodit Zgjedhor, rasti i Tiranës nuk parashikohet nga asnjëra prej tyre. Pra, praktikisht dhe ligjërisht, zgjedhjet e pjesshme në Tiranë do të mbahen midis 15 prillit dhe 15 majit 2026.
Pas vendimit të Gjykatës Kushtetuese, KQZ njoftoi se kishte pezulluar përgatitjet për zgjedhjet në Tiranë, që do të thotë se praktikisht dhe teknikisht, institucioni që organizon zgjedhjet nuk do ta ketë parasysh kryeqytetin.
Por ajo që bie në sy është fakti se as Edi Rama, Kryeministër dhe kreu i Partisë Socialiste, dhe as Sali Berisha, kreu i Partisë Demokratike, nuk po e ndalin fushatën. Ekipi i mandatuar nga Rama për në Tiranë vazhdon takimet në mbështetje të Ogerta Manastirliut, kandidates që do të përfaqësonte socialistët në garën e 9 nëntorit nëse do të mbaheshin zgjedhje në Tiranë. Dhe po kështu, mandatarët e Sali Berishës vazhdojnë takimet me strukturat në mbështetje të Florjan Binajt, kandidatit të pavarur, i cili synon Bashkinë e Tiranës.
Kampet përkatëse publikojnë çdo ditë foto nga takimet, të shoqëruara me mesazhe mbështetjeje, madje me intensitet më të madh.
Një kërkim i shpejtë në rrjetet sociale është i mjaftueshëm për të kuptuar se çfarë po ndodh. Nga njëra anë, Manastirliu shfaqet me një bllok në dorë duke mbledhur ankesat e qytetarëve, më pas shfaqet duke u takuar me grupet e interesit, ndërsa njerëzit e mandatuar të Berishës mbledhin strukturat dhe përpiqen t'i bindin ata të punojnë në mbështetje të Binajt të pavarur.
Situata bëhet komike për faktin se e gjithë vëmendja është përqendruar në Tiranë, ku pas vendimit të Gjykatës Kushtetuese nuk do të ketë zgjedhje më 9 nëntor, ndërsa procesi i pjesshëm vazhdon në 5 bashki të tjera: Vlorë, Berat, Klos, Cërrik dhe Tepelenë. Të gjitha njësi të kontrolluara nga socialistët e Edi Ramës, por me përjashtim të Vlorës ku Kryetari i Bashkisë dha dorëheqjen, në të tjerat, ata kandiduan për deputetë dhe dorëzuan mandatet e tyre.
Pavarësisht faktit që KQZ-ja ka caktuar 1 nëntorin si ditën e fillimit të fushatës, askush nuk do t’i ndalonte Ramën dhe Berishën, apo ata të mandatuar prej tyre, të bënin atë që po bëjnë në Tiranë në njësitë ku do të mbahen zgjedhjet më 9 nëntor. Partitë kanë përcaktuar kandidatët, socialistët më të organizuar kanë filluar takimet në terren, ndërsa demokratët dhe aleatët e tyre, të mpirë si nga rezultati i 11 majit, por edhe nga fakti që po mbështesin të pavarurit, duket se janë ‘dorëzuar’ pa hyrë në garë.
Pavarësisht deklaratave publike të Berishës që përshëndetën vendimin e Gjykatës Kushtetuese, i cili në një farë mënyre i dha opozitës pak hapësirë frymëmarrjeje duke i mbajtur pezull zgjedhjet në bashkinë më të madhe të vendit, në praktikë, duket se ata po e injorojnë atë.
Dhe ndoshta nëse do të varej prej tyre, Berishës dhe Ramës, do të gjenin 'marrëveshjen' për të mbajtur zgjedhjet, duke i hapur rrugën një udhëheqësi të ri në Tiranë, pavarësisht se si do të quhet. /Pamfleti/
Lini një Përgjigje