FLASH
Shkruar nga Pamfleti
Ekonomia shqiptare po përballet me sfida të rëndësishme si plakja e shpejtë e popullsisë dhe emigrimi i të rinjve. Për të frenuar këto fenomene, BERZH dhe Banka e Shqipërisë nënvizojnë nevojën për projekte dhe investime të qëndrueshme.
Guvernatori i Bankës së Shqipërisë, Gent Sejko, thekson se emigracioni, plakja e popullsisë dhe mungesa e fuqisë punëtore paraqesin rreziqe serioze për ekonominë. Ai thekson se kjo pikë kthese demografike kërkon vëmendje të shtuar dhe zgjidhje afatgjata.
“Ndërsa gjithnjë e më pak njerëz hyjnë në tregun e punës, gjithnjë e më shumë janë të varur nga sistemet e pensioneve dhe kujdesi shëndetësor. Këto ndryshime po ushtrojnë presion mbi produktivitetin, financat publike, politikat e prioritizimit dhe perspektivat afatgjata të rritjes në rajone të ndryshme,” tha Gent Sejko.
Për drejtoreshën e BERZH për Shqipërinë, Ekaterina Solovova, investimet dhe projektet që krijojnë vende pune janë mundësi të mira për të mbështetur një ekonomi të qëndrueshme.
“Në vitin 2025, BERZH u angazhua në 31 projekte me vlerë 217 milionë euro. Nga kjo shumë, 111 milionë euro u investuan në infrastrukturë të qëndrueshme në transport dhe energji. Mbështetëm gjithashtu turizmin, agroturizmin, të rinjtë dhe përfshirjen e grave në biznes,” tha Solovova.
Në prezantimin e Raportit të Tranzicionit 2025-2026, u diskutua nevoja për veprime të koordinuara dhe vullnet politik për reformimin e sistemit të pensioneve, modernizimin e tregut të punës dhe politika të qarta për migracionin./EuronewsAlbania
Lini një Përgjigje