FLASH
Shkruar nga Pamfleti
Zgjedhjet lokale të zhvilluara sot në disa komuna të Serbisë janë shoqëruar me incidente serioze dhe akuza për parregullsi, sipas raportimeve të mediave dhe deklaratave të organizatave në terren.
Sipas televizionit N1 dhe dëshmive të studentëve të përfshirë në monitorimin e procesit, pranë qendrës së votimit nr. 34 në Bor është sulmuar një ekip gazetarësh dhe studentësh. Ata deklarojnë se sulmuesit përdorën një sëpatë, thyen pajisjet dhe morën kamerat, ndërsa disa persona mbetën të plagosur dhe përfunduan në urgjencë.
Në mesin e të sulmuarve ishte edhe gazetari Lazar Dinić, i cili, sipas Shoqatës së Gazetarëve të Pavarur të Vojvodinës, u rrah dhe mbeti i gjakosur, duke pritur ndihmë mjekësore pasi iu vodh telefoni.
Ndërkohë, lëvizja “Kreni-Promeni” njoftoi arrestimin e tre vëzhguesve të saj në Aranđelovac, duke e cilësuar këtë veprim si pasojë të presionit politik dhe fushatave mediatike kundër disidentëve. Avokatët e tyre janë angazhuar menjëherë për mbrojtje ligjore.
Pretendime për parregullsi janë raportuar edhe në zona të tjera. Një vëzhgues në Kula deklaroi se në Sivac ka indikacione për lista paralele votuesish dhe blerje votash. Sipas tij, policia nuk ka reaguar në kohë, pavarësisht thirrjeve të qytetarëve.
Gjithashtu, janë raportuar persona të maskuar pranë qendrave të votimit dhe tensione mes vëzhguesve dhe individëve të paidentifikuar. Në disa raste, sipas dëshmive, policia ka qenë e pranishme por nuk ka ndërhyrë në mënyrë aktive.
Partia opozitare “Srce” deklaroi se situata tregon një dobësim të sundimit të ligjit dhe akuzoi policinë për mosveprim përballë sulmeve ndaj gazetarëve, aktivistëve dhe vëzhguesve. Sipas saj, incidentet nuk janë të izoluara, por pjesë e një modeli presioni ndaj procesit zgjedhor.
Autoritetet zyrtare nuk kanë dhënë ende një reagim të detajuar për të gjitha incidentet e raportuara. Ndërkohë, ekipet e monitorimit në terren kanë deklaruar se do të vazhdojnë të ndjekin procesin deri në përfundim të votimit.
Lini një Përgjigje