FLASH
Shkruar nga Pamfleti
Këshilli i Sigurimit të Kombeve të Bashkuara ka njoftuar se do të mblidhet për një takim urgjent pas vrasjes së shefit të Byrosë Politike të Hamasit, Ismail Haniyeh në Iran.
Zëvendës Përfaqësuesi i Parë i Përhershëm rus në Kombet e Bashkuara Dmitry Polyansky tha se takimi i jashtëzakonshëm do të mbahet në orën 16:00 me orën e Nju Jorkut më 31 korrik.
“Pas një kërkese nga Irani që u mbështet nga Kina, Algjeria dhe Rusia, dhe duke shërbyer si kryetar i radhës në KS të OKB-së, ne caktuam një takim të jashtëzakonshëm të Këshillit të Sigurimit të OKB-së në lidhje me vrasjen në Teheran të kreut të Byrosë Politike të Hamasit. Ismail Haniyeh për orën 16:00 me orën e Nju Jorkut më 31 korrik”, shkroi Polyansky në Telegram.
Më herët, lëvizja palestineze Hamas tha se Haniyeh ishte vrarë në një sulm izraelit që synonte rezidencën ku ai po qëndronte në Teheran, ku kishte mbërritur për inaugurimin e presidentit të zgjedhur të vendit, Masoud Pezeshkian.
"Al Hadath" raportoi se Haniyeh u vra në një sulm të drejtpërdrejtë me raketa. Zëvendëskryetari i Byrosë Politike të Hamasit, Mousa Abu Marzook ka paralajmëruar se vrasja e Haniyeh nuk do të mbetet pa përgjigje. Autoritetet izraelite nuk pranuan të komentojnë për CNN mbi vdekjen e Haniyeh.
Lini një Përgjigje