FLASH
Shkruar nga Pamfleti
Presidenti francez, Emmanuel Macron, nga Mbretëria e Bashkuar, ku ka nisur një vizitë shtetërore 3-ditore ka deklaruar se Europa nuk mund të ketë një varësi të tepërt qoftë nga SHBA ashtu edhe nga Kina.
Ai tha se kontinenti duhet të “çlirohet” nga “këto varësi të dyfishta”.
“Ne duam një botë të hapur. Ne duam të bashkëpunojmë, por jo të varemi. Dhe çdo herë që varemi, çdo herë që nuk jemi në gjendje të ngrihemi, të vendosim dhe të biem dakord të mos pajtohemi, ky është fillimi i problemit tonë”, tha Macron.
Në vijim Presidenti i Francës theksoi se Evropa duhet të mbrojë modelet e saj demokratike kundër ndërhyrjeve të huaja, dezinformimit dhe ndikimit shkatërrues të mediave sociale, çuditërisht, duke iu referuar hitit të Netflix-it “Adolescence”, duke e sjellë këtë çështje në qendër të vëmendjes.
Ai kërkon rregulla të reja në këtë fushë.
“Përndryshe, e ardhmja jonë do të vendoset nga ata që do të vendosin për këtë algoritëm”, paralajmëron Macron.
Duke u kthyer te Britania, Macron argumenton se edhe pse nuk është pjesë e Bashkimit Evropian, “Mbretëria e Bashkuar nuk mund të qëndrojë mënjanë, sepse mbrojtja dhe siguria, konkurrueshmëria, demokracia, vetë thelbi i identitetit tonë janë të lidhura në të gjithë Evropën si kontinent.”
“Le të shprehim një dëshirë së bashku: të mos lejojmë që Kanali Anglez të zgjerohet”,, tha Presidenti francez.
Ai i nxiti të dy vendet të “rregullojnë” kufizimet pas Brexit-it mbi lëvizshmërinë e studentëve, studiuesve, intelektualëve dhe artistëve, ndërsa paralajmëron se përndryshe: “ekziston rreziku që shoqëritë tona po ndahen, të rinjtë tanë nuk e njohin mirë njëri-tjetrin dhe mund të përfundojnë të huaj në një kohë kur ngjarjet aktuale ndërkombëtare na kujtojnë çdo ditë të ardhmen tonë të përbashkët.”
Macron tha se nuk mund të lejojmë që rregullat e migracionit të shkelen nga rrjetet kriminale që shfrytëzojnë shpresat për një jetë më të mirë.
Ai thotë se të dy vendet kanë “një përgjegjësi të përbashkët” për të adresuar migracionin e parregullt me “humanizëm, solidaritet dhe vendosmëri”.
Por ai shtoi se nevojitet më shumë edhe në nivel më të gjerë evropian për të punuar drejt “një zgjidhjeje të qëndrueshme dhe efektive”.
Lini një Përgjigje