FLASH
Shkruar nga Pamfleti
Të qarta janë gjithashtu edhe pasojat që përfshijnë demilitarizimin e Ukrainës, zgjedhjet e reja në Kiev dhe negociatat për anëtarësimin e mundshëm të Kievit në Bashkimin Evropian
Javën e kaluar, ministrat e Jashtëm të Shteteve të Bashkuara dhe Ukrainës u takuan në Arabinë Saudite për të negociuar një zgjidhje për konfliktin mes Moskës dhe Kievit, të shkaktuar nga pushtimi rus mbi më shumë se tre vjet më parë.
Ukraina ka pranuar një armëpushim prej 30 ditësh, gjatë të cilit palët, me ndërmjetësimin e SHBA-ve, duhet të bisedojnë për kushtet e një paqeje “të drejtë dhe të qëndrueshme”.
Më pas, Steve Witkoff, i dërguari personal i Trump, ka udhëtuar në Moskë për t’i paraqitur Putin propozimin. Presidenti rus ka shprehur gatishmërinë, por ka theksuar se mbeten për t'u sqaruar "shumë detaje" dhe se armëpushimi duhet të çojë në "një paqe afatgjatë", duke eleminuar "shkaqet themelore të krizës".
Zëdhënësi i tij ka sugjeruar se, për këtë qëllim, një bisedë telefonike me Trumpin do të ishte e nevojshme së shpejti. Presidenti ukrainas Volodymyr Zelensky dhe Bashkimi Evropian, së bashku me Mbretërinë e Bashkuar, kanë akuzuar Kremlinin se dëshiron të fitojë kohë dhe se ka refuzuar në thelb armëpushimin e menjëhershëm të kërkuar nga Shtëpia e Bardhë.
Fjalët e Trump
Në mbrëmje, duke folur me gazetarët në bord të Air Force One, presidenti Trump bëri të ditur se do të flasë të martën me Putin në telefon. “Gjatë fundjavës është bërë një punë shumë e madhe,” tha Trump. “Do të shohim nëse të martën (pas bisedës telefonike me Putin) do të kemi diçka për të shpallur.”
Rreth bisedës së tij të afërt me presidentin rus, Trump theksoi: “Mendoj se do të flasim për territoret: situata në terren është shumë më e ndryshme se sa ishte para luftës. Do të flasim për centralet energjetike, kjo është një çështje e madhe. Por kemi biseduar tashmë për këto çështje me të dyja palët, kemi folur për mënyrën e ndarjes së disa pasurive, jemi duke punuar për këtë.” Pak orë më parë, i intervistuar nga CNN, ndërmjetësi i tij Witkoff kishte deklaruar se Putin "pranon filozofinë e Trump" për armëpushimin dhe kushtet e paqes, duke shtuar se bisedimet disa orëshe me presidentin rus ishin "pozitive", por duke refuzuar të jepte detaje.
Territoret
Edhe para se të niste negociatat, Trump e ka përsëritur se Ukraina nuk mund të bëhet anëtare e NATO-s dhe as të rikthejë territoret e pushtuara nga Rusia që nga shkurti i vitit 2022. Kjo bën të mendohet se një marrëveshje e përgjithshme me Kievin është arritur në lidhje me këtë çështje gjatë negociatave në Arabinë Saudite. Kur Trump thotë se do të flasë me Putin për “terretoret”, është e mundur që ai të aludojë për mënyrën e përcaktimit të kufirit mes Rusisë dhe Ukrainës: duke e ngrirë atë në pozitat aktuale, pa bërë asnjë dhënie territoresh për Moskën nga pikëpamja formale, siç duket se do të donte Zelensky, ose duke pranuar se pjesa e Ukrainës e pushtuar, veçanërisht Krimea (pushtuar që nga viti 2014) dhe Donbasi (pjesërisht i pushtuar që nga viti 2014), i përkasin Rusisë, siç do të donte Putin.
Centralet energjetike
Është e mundur që me deklaratat e tij të dielën, Trump të ketë pasur parasysh centralin bërthamor të Zaporizhzhia, të pushtuar nga forcat ruse në juglindje të Ukrainës. Një mundësi kthimi i tij në Ukrainë, e cila nxirrte nga këta reaktorë një pjesë të nevojave të saj energjetike, mund të jetë një shkëmbim me pjesën gjithnjë e më të vogël të territorit rus, në rajonin kufitar të Kurskut, të pushtuar nga forcat ukrainase vitin e kaluar me një ofensivë të papritur. Një tërheqje e mundshme ukrainase nga Kursku në këmbim të centralit të Zaporizhzhia është një hipotezë që mund të bjerë brenda fushës së “pasurive për t'u ndarë” për të cilat ka përmendur presidenti i Shteteve të Bashkuara. Në këtë kategori hyjnë gjithashtu edhe “tokat e pasura” me minerale, shfrytëzimi i të cilave kërkohet nga Trump si një kompensim për ndihmat amerikane në Kiev (dhe si garanci për një praninë amerikane, edhe pse vetëm civile).
Forca e paqes evropiane
Çështja më e vështirë për t'u zgjidhur mund të jetë prania e një force ushtarake evropiane në Ukrainë për të mbrojtur paqen pas një mundësie marrëveshje. Putin është shprehur kundër kësaj me forcë. Presidenti francez Emmanuel Macron ka deklaruar se trupat e asaj që quhet “koalicioni i të gatshëm” të organizuar me kryeministrin britanik Keir Starmer, i përbërë nga ushtarë të Francës, Mbretërisë së Bashkuar, Australisë dhe disa shteteve të tjera, mund të stacionohen në Ukrainë “pa kërkuar lejen e Moskës”. Sot, Rusia ka hapur një mundësi për një prani ndërkombëtare pas një marrëveshjeje, por ka folur vetëm për “vëzhgues jo ushtarkë”: një mundësi shumë e ndryshme nga ajo e propozuar nga "të gatshmit".
Të qarta janë gjithashtu pasojat e kësaj pike, që përfshijnë demilitarizimin e Ukrainës, zgjedhjet e reja në Kiev dhe negociatat për anëtarësimin e mundshëm të Kievit në Bashkimin Evropian, çështje mbi të cilat duket se ka një mosmarrëveshje të thellë për momentin. Po ashtu, mbetet e pasigurt "mbështetje" ose ndihma amerikane për një forcë paqeje evropiane, kërkuar nga Londra dhe Parisi, por që deri tani nuk është dhënë nga Uashingtoni.
Sanksionet ndaj Rusisë
Dhe pastaj janë sanksionet perëndimore ndaj Rusisë. Megjithëse deri tani nuk janë përmendur publikisht nga Moska ose Uashingtoni, ato janë kundërpërgjigja që Shtetet e Bashkuara mund të ofrojnë, së bashku me aleatët evropianë dhe G7, për të bërë disa lëshime nga Putin në aspekte të tjera të planit të paqes. Tregtia dhe investimet mund të rifillojnë. Këtë mëngjes, Financial Times citoi burime nga City dhe Wall Street, sipas të cilave botëra financiare dhe ato të biznesit të Perëndimit presin një rikthim të afërt në Rusi, të braktisur si hakmarrje për pushtimin e Ukrainës tri vjet më parë. Vetë Putin ka thënë se furnizimet me gazin rus “me kosto të ulët” drejt Europës mund të rinisin së shpejti, me përfitime të ndërsjella. Trump mund të heqë gjithashtu ostracizmin ndaj presidentit rus, i cili është nën urdhër arresti të Gjykatës Penale Ndërkombëtare (e cila megjithatë nuk njihet nga SHBA) për shkeljet e të drejtave të njeriut të kryera nga trupat e tij në Ukrainë. Së bashku me karrotën, në teori ekziston gjithashtu gishti: nëse Putin refuzon armëpushimin, Shtëpia e Bardhë kërcënon me sanksione edhe më të ashpra. Dhe Europa po shqyrton konfiskimin e 300 miliardë dollarëve të pasurive ruse të depozituara në bankat e kontinentit tonë./ Përshtatur nga La Repubblica
Lini një Përgjigje