FLASH
Shkruar nga Pamfleti
Sekretari i Thesarit i Shteteve të Bashkuara, Scott Bessent, njoftoi sot masa të ashpra kundër linjave ajrore iraniane si pjesë e “Operacionit Ekonomik Fury”. Masat synojnë të kufizojnë aksesin e kompanive ajrore iraniane në infrastrukturën ndërkombëtare, por me një përjashtim të qartë për udhëtarët që shkojnë në pelegrinazhin e Haxhit në Mekë.
Gjatë një konference për shtyp në Shtëpinë e Bardhë, Bessent deklaroi se Uashingtoni do të mbyllë efektivisht aksesin e linjave ajrore iraniane në pikat e uljes, furnizimin me karburant dhe shitjen e biletave në nivel global.
Ai theksoi se Shtetet e Bashkuara nuk mund të ndalojnë drejtpërdrejt operacionet e linjave ajrore iraniane jashtë territorit të tyre, por mekanizmi i sanksioneve dytësore synon të krijojë një presion të fortë indirekt mbi partnerët ndërkombëtarë, duke i detyruar ata të zgjedhin mes bashkëpunimit me Iranin ose ruajtjes së lidhjeve financiare dhe tregtare me SHBA-në.
“Linjat ajrore iraniane do të përballen me kufizime të rrepta. Çdo aeroport, kompani furnizuese karburanti ose agjenci që ofron shërbime ose pranon tarifa uljeje nga ato, do të ekspozohen ndaj sanksioneve dytësore amerikane”, tha Bessent.
Megjithatë, administrata amerikane ka vendosur një përjashtim të rëndësishëm për arsye humanitare dhe fetare. Bessent theksoi se masat nuk do të aplikohen për iranianët që udhëtojnë drejt Arabisë Saudite për të kryer pelegrinazhin vjetor të Haxhit.
“Ne respektojmë dimensionin fetar të udhëtimit për në Mekë. Pelegrinët myslimanë iranianë do të jenë të përjashtuar nga këto kufizime gjatë periudhës së Haxhit,” deklaroi ai.
Lini një Përgjigje