FLASH
Shkruar nga Pamfleti
Lirohet fituesja e çmimit Nobel...
Në një lëvizje të befasishme diplomatike, autoritetet bjelloruse kanë liruar 123 të burgosur politikë, përfshirë aktivisten e njohur të opozitës Maria Kolesnikova dhe fituesin e Çmimit Nobel për Paqe, Ales Bialiatski, pas një marrëveshjeje me Shtetet e Bashkuara për lehtësimin e sanksioneve ekonomike ndaj vendit.
Lajmi u konfirmua nga Tatiana Khomich, motra e Kolesnikovës, e cila tha për BBC se më në fund kishte mundur të fliste me të përmes një video-telefonate: “Ajo është e lirë, duket mirë, është e fortë.” Fjalët e para të Kolesnikovës ishin një falënderim për administratën amerikane, Presidentin Donald Trump dhe autoritetet bjelloruse “për bisedimet dhe marrëveshjen e arritur”.
Bisedimet janë zhvilluar në Minsk nga i dërguari i posaçëm i Presidentit Trump për Bjellorusinë, John Coale, i cili deklaroi se “me normalizimin e marrëdhënieve mes dy vendeve, gjithnjë e më shumë sanksione do të hiqen.” Si hap i parë, SHBA ka rënë dakord të heqë sanksionet ndaj potasit, një përbërës kyç në industrinë e plehrave kimike dhe një ndër eksportet më të rëndësishme të Bjellorusisë.
Lirimi i të burgosurve përfaqëson një fitore të dukshme për Presidentin autoritar Alexander Lukashenko, i cili prej vitesh ka qenë i izoluar ndërkombëtarisht pas zgjedhjeve të kontestuara të vitit 2020 dhe shtypjes brutale të protestave popullore. As Bashkimi Evropian dhe as SHBA nuk e kanë njohur rezultatin e atyre zgjedhjeve, dhe qindra aktivistë u burgosën, përfshirë edhe vetë Kolesnikovan.
Ndërsa Europa vijon me linjën e izolimit dhe sanksioneve ndaj regjimit të Minskut, Shtetet e Bashkuara po sinjalizojnë një ndryshim rrënjësor të qasjes, duke kërkuar dialog, lëshime graduale dhe mundësi për bashkëpunim në çështje të tjera rajonale, përfshirë edhe konfliktin në Ukrainë.
John Coale, sipas mediave shtetërore bjelloruse, ka diskutuar me Lukashenkon edhe për rolin që Bjellorusia mund të luajë në bisedimet me Kremlinin.
Ndërkohë, në Vilnius të Lituanisë pritet të mbërrijë një grup i të liruarve, ndërsa përpara ambasadës amerikane po mblidhen qytetarë, aktivistë dhe media, për të mirëpritur këtë kthesë të papritur politike.
Lini një Përgjigje