FLASH
Shkruar nga Pamfleti
Një gjykatës federal ka vendosur të mos bëjë publike transkriptet dhe provat e mbledhura nga juria e madhe gjatë hetimit mbi Jeffrey Epstein, duke rrëzuar kërkesën e Departamentit të Drejtësisë (DOJ) për t’i zbuluar ato.
Gjykatësi Richard Berman argumentoi se DOJ nuk arriti të kapërcente precedentët ligjorë që mbrojnë fshehtësinë e materialeve të jurisë së madhe. Ai theksoi gjithashtu se këto të dhëna përbëjnë vetëm një pjesë të vogël të dosjes së plotë të hetimit, e cila tashmë ndodhet në duart e Departamentit të Drejtësisë.
“Informacioni i përmbajtur në transkriptet e jurisë së madhe për Epstein është i papërfillshëm në krahasim me materialet e gjera që zotëron Departamenti i Drejtësisë,” shkroi gjykatësi Berman.
Ky është gjykatësi i tretë federal që refuzon të publikojë dokumente të tilla në lidhje me Epstein, duke ndjekur linjën e dy gjyqtarëve të tjerë në Nju Jork dhe Florida, të cilët arsyetuan se kërkesa e DOJ nuk ishte as në interes publik dhe as e mbështetur nga ligji.
Gjykatësi Berman shtoi se një tjetër arsye e fortë për të mbajtur të mbyllura këto materiale lidhet me mbrojtjen e viktimave të Epstein, të cilat mund të përballeshin me rrezik për sigurinë dhe privatësinë e tyre nëse dokumentet do të bëheshin publike.
Në anën tjetër, Departamenti i Drejtësisë refuzoi të komentojë mbi vendimin, ndërkohë që përballet me kritika të ashpra për mungesën e transparencës. Në fillim të vitit, zyrtarë të lartë kishin premtuar publikimin e më shumë dokumenteve, por që nga maji kanë filluar të tërhiqen, duke e minimizuar çështjen.
Presioni politik dhe reagimet publike
Çështja është bërë gjithnjë e më e nxehtë në arenën politike amerikane. Administrata Trump është përballur me thirrje të vazhdueshme për të zbuluar më shumë rreth dosjeve të Epstein, sidomos pasi ish-Prokurorja e Përgjithshme Pam Bondi kishte paralajmëruar Trump se emri i tij figuron në dokumente. Në korrik, DOJ lëshoi një memo të pa nënshkruar duke deklaruar se nuk do të publikonte më dokumente të tjera, gjë që shkaktoi zemërim si tek demokratët, ashtu edhe tek baza politike e Trump.
Përpjekjet e DOJ kanë përfshirë edhe rastin e Ghislaine Maxwell, bashkëpunëtorja e ngushtë e Epstein, e cila po vuan një dënim prej 20 vitesh për abuzim dhe trafikim të miturish. Edhe aty, një gjykatës federal në Nju Jork refuzoi kërkesën për publikimin e materialeve të jurisë së madhe, duke e quajtur të pabazë dhe jashtë interesit publik.
Në korrik, Maxwell është marrë në pyetje gjatë dy ditëve nga zëvendësprokurori i përgjithshëm Todd Blanche në zyrën e Prokurorit të SHBA-së në Tallahassee, Florida. DOJ po përgatit transkriptimin e një regjistrimi 10-orësh të këtij interviste.
Lini një Përgjigje