FLASH
Shkruar nga Pamfleti
Presidenti turk, Rexhep Tayip Erdogan ka zhvilluar sot një bisedë telefonike me homologun e tij rus, Vladimir Putin, për të shprehur mbështetjen e tij ndaj qeverisë ruse, lidhur me kryengritjen e grupit Wagner.
Në një deklaratë me shkrim të shpërndarë nga Kremlini, thuhet se Erdogan shprehu mbështetje të plotë për hapat e ndërmarrë nga udhëheqja ruse.
"Presidenti i Rusisë dha informacione për situatën në vend në lidhje me një tentativë rebelimi të armatosur. Presidenti i republikës së Turqisë shprehu mbështetjen e plotë për hapat e ndërmarrë nga udhëheqja ruse", thuhej në njoftim.
Më herët, Putin kishte thënë se i kishte dhënë urdhra ushtrisë për të neutralizuar ata që organizuan rebelimin e armatosur. Duke iu drejtuar kombit, ai akuzoi shefin e Wagner, Yevgeny Prigozhin për "tradhti".
Kryengritja filloi herët të shtunën kur luftëtarët e Wagner morën qytetin e Rostovit përpara se të niseshin për në Voronezh. Tensionet midis Moskës dhe grupit paraushtarak u rritën pasi Prigozhin akuzoi forcat ruse se kishin sulmuar luftëtarët e tij në Ukrainë. Rusia i mohoi këto pretendime të premten vonë dhe lëshoi urdhra arresti për Prigozhin.
Prigozhin, në muajt e fundit, ka akuzuar vazhdimisht Rusinë se nuk furnizon me armë të mjaftueshme grupin paraushtarak që ka luftuar përkrah ushtrisë ruse në Ukrainë.
Ndërkohë që Rusia është mbështetur tek Wagner për të kryer operacionet e saj në Siri dhe Ukrainë, me grupin e njohur gjithashtu për përfshirjen e tij në konflikte të tjera në mbarë botën, duke përfshirë Libinë, Sudanin dhe Mozambikun.
Lini një Përgjigje