FLASH
Shkruar nga Pamfleti
Një gjykatë në provincën veriore Jilin të Kinës ka dënuar me vdekje me kusht ish-ministrin e Bujqësisë dhe Çështjeve Rurale, Tang Renjian, për akuzën e marrjes së ryshfeteve në masë të mëdha. Lajmi u bë i ditur përmes agjencisë zyrtare shtetërore të lajmeve Xinhua, e cila raportoi se dënimi përfshin një pezullim dyvjeçar, duke lënë të hapur mundësinë e faljes nëse i pandehuri vazhdon të bashkëpunojë.
Sipas detajave të publikuara nga gjykata e qytetit Changchun, Tang Renjian ka pranuar më shumë se 268 milionë juanë (rreth 37.6 milionë dollarë amerikanë) në formë parash dhe pasurish të paluajtshme gjatë periudhës së tij në pozicione të larta publike, nga viti 2007 deri në 2024. Hetimet kanë zbuluar se këto ryshfete u morën në këmbim të favoreve zyrtare, duke shkelur rëndë rregullat e Partisë Komuniste të Kinës (PKK).
"Gjykata e ka marrë parasysh pranimin e fajit nga ana e të pandehurit dhe bashkëpunimin e tij të plotë me autoritetet, duke vendosur pezullimin e dënimit për dy vjet", thuhet në vendimin gjyqësor.
Nëse Tang nuk kryen shkelje të reja gjatë këtij periudhe, dënimi mund të zëvendësohet me burgim të përjetshëm ose një masë më të lehtë. Tang Renjian u përjashtua nga PKK në nëntor 2024, vetëm gjashtë muaj pasi Komisioni Qendror për Disiplinën e Partisë kishte nisur hetimet kundër tij për korrupsion.
Ai u shkarkua menjëherë nga detyra e ministrit, një post që mbajti pas një karriere të gjatë në administratën publike. Para emërimit në krye të Ministrisë së Bujqësisë në vitin 2020, Tang shërbeu si guvernator i provincës perëndimore Gansu nga 2017 deri në 2020, ku drejtoi politika zhvillimi rural dhe bujqësor.
Ky rast vjen në kontekstin e fushatës së gjerë antikorrupsion të nisur nga presidenti Xi Jinping, i cili në janar të këtij viti deklaroi se "korrupsioni mbetet kërcënimi më i madh për mbijetesën e Partisë Komuniste". Fushata ka goditur figura të larta të shtetit, duke përfshirë ish-ministrin e Mbrojtjes Li Shangfu dhe paraardhësin e tij Wei Fenghe, të cilët u dënuan për vepra të ngjashme të korrupsionit.
Që nga viti 2012, mijëra zyrtarë janë hetuar në kuadër të kësaj iniciative, e cila synon të forcojë integritetin e PKK-së dhe të sigurojë stabilitetin e regjimit. Autoritetet kineze nuk kanë dhënë detaje shtesë mbi pasojat e mundshme për familjen e Tang ose ndikimin në sektorin bujqësor, por analistët thonë se ky dënim sinjalizon vazhdueshmërinë e luftës së ashpër kundër abuzimeve financiare në nivelet e larta.
Lini një Përgjigje