FLASH
Shkruar nga Pamfleti
Sekretari i Përgjithshëm i NATO-s, Mark Rutte, ka ritheksuar rëndësinë e rolit të Shteteve të Bashkuara në sigurinë evropiane, duke u shprehur kundër idesë që Bashkimi Evropian të lëvizë drejt një autonomie strategjike të plotë nga Uashingtoni.
Në një intervistë për agjencinë gjermane DPA, Rutte tha se është e natyrshme që vendet evropiane të marrin gradualisht më shumë përgjegjësi për mbrojtjen e kontinentit, por kjo, sipas tij, duhet të ndodhë brenda kornizës së NATO-s dhe me SHBA-të të pranishme në aleancë.
“Është mjaft logjike që ne gradualisht po marrim më shumë përgjegjësi për mbrojtjen evropiane, por në të njëjtën anë ku SHBA-të, të cilat e mbështesin plotësisht NATO-n, mbeten në aleancë dhe në Evropë”, u shpreh ai.
Rutte theksoi gjithashtu se koncepti i sigurisë në Evropë nuk kufizohet vetëm te Bashkimi Evropian.
“Kur flasim për Evropën dhe NATO-n, është më shumë sesa vetëm BE-ja”, shtoi Sekretari i Përgjithshëm.
Ai kujtoi vendimet e marra në samitin e NATO-s të mbajtur këtë verë në Hagë, ku vendet anëtare ranë dakord të rrisin shpenzimet për mbrojtjen deri në 5% të Prodhimit të Brendshëm Bruto deri në vitin 2035. Sipas Rutte-s, ky vendim përfaqëson një arritje të rëndësishme politike.
“Unë besoj se deri më sot, ky është një nga sukseset më të mëdha të politikës së jashtme të Presidentit të SHBA-së Donald Trump”, deklaroi ai.
Qëndrimi i Rutte-s duket se vendos theksin te bashkëpunimi transatlantik dhe forcimi i NATO-s si themeli kryesor i mbrojtjes kolektive, në vend të krijimit të strukturave paralele të sigurisë në Evropë.
Lini një Përgjigje