FLASH
Shkruar nga Pamfleti
Pamje të filmuara në Brooklyn dhe Queens tregojnë persona që hyjnë dhe dalin nga rrjeti nëntokësor i kanalizimeve. Autoritetet po përpiqen të zbulojnë identitetin dhe qëllimin e tyre.
Një mister i pazakontë ka tërhequr vëmendjen e banorëve dhe autoriteteve në Nju Jork, pasi grupe personash janë filmuar duke hyrë dhe dalë nga rrjeti i kanalizimeve të qytetit përmes pusetave në lagje të ndryshme të Brooklyn-it dhe Queens-it.
Sipas raportimeve, të paktën tre incidente të veçanta janë regjistruar në video, ku persona të paidentifikuar shfaqen duke lëvizur në sistemin nëntokësor të kanalizimeve.
Në një nga videot, e filmuar mëngjesin e së premtes në zonën Williamsburg të Brooklyn-it, rreth shtatë persona dalin nga një pusetë në mes të një kryqëzimi të frekuentuar. Kalimtarët dhe drejtuesit e automjeteve i kanë vëzhguar me habi ndërsa ata dilnin njëri pas tjetrit nga nëntoka.
Disa prej tyre mbanin llamba në kokë, ndërsa të tjerë transportonin lopata dhe mjete të tjera pune. Njëri prej personave për pak sa nuk u përplas nga një automjet në momentin që po dilte nga pusetë.
Një tjetër video, e regjistruar rreth orës 02:00 të mëngjesit në lagjen Gravesend të Brooklyn-it, tregon sërish rreth shtatë persona që dalin nga një pusetë në një rrugë të qetë rezidenciale. Më pas ata shihen pranë disa automjeteve të parkuara duke nxjerrë rroba të pastra për t’u ndërruar.
Sipas policisë, kjo grupi kishte hyrë në rrjetin e kanalizimeve rreth orës 23:00, duke qëndruar nën tokë për afro tre orë.
Një incident i tretë është regjistruar më 5 maj në Queens. Tre persona të pajisur me çizme të papërshkueshme nga uji dhe pajisje të tjera mbrojtëse hapën me forcë kapakun e një pusetë mirëmbajtjeje dhe zbritën në kanalizime. Personi i fundit mbylli kapakun pas tyre, ndërsa automjetet që po afroheshin u detyruan të ngadalësonin dhe të ndalonin.
Autoritetet e Nju Jorkut kanë nisur hetime për të përcaktuar identitetin e personave të përfshirë dhe arsyet e pranisë së tyre në rrjetin nëntokësor të qytetit. Deri tani nuk është bërë e ditur nëse bëhet fjalë për eksplorues urbanë, punonjës të paautorizuar apo persona të përfshirë në aktivitete të tjera.
Lini një Përgjigje