FLASH
Shkruar nga Pamfleti
Sekretari i Përgjithshëm i NATO-s pranon mangësi nga disa shtete, ndërsa thekson kontributin e shumicës së aleatëve
Sekretari i Përgjithshëm i NATO-s, Mark Rutte, pranoi se ka pasur mangësi nga disa vende anëtare, por theksoi se shumica e aleatëve kanë ofruar mbështetje thelbësore.
Duke folur për CNNi, ai deklaroi se “disa vende” nuk u treguan në lartësinë e rrethanave, megjithatë sqaroi se “pjesa më e madhe e vendeve evropiane bëri atë që kishte premtuar”.
Sipas tij, shumë vende kontribuan në mënyrë konkrete duke ofruar baza, lehtësira logjistike dhe leje për fluturime mbi territorin e tyre, duke përmbushur angazhimet në një moment kritik.
Rutte e cilësoi takimin me Donald Trump si “të sinqertë dhe të hapur”, duke theksuar se presidenti amerikan shprehu pakënaqësinë e tij për qëndrimin e disa aleatëve.
“Bota është më e sigurt sot” falë Trump
Në të njëjtën kohë, Mark Rutte u shpreh se bota është sot më e sigurt krahasuar me periudhën para luftës me Iranin.
Duke iu përgjigjur një pyetjeje për këtë çështje, ai tha se kjo lidhet me lidershipin e Donald Trump, duke nënvizuar se dobësimi i kapaciteteve ushtarake të Teheranit është “shumë i rëndësishëm” për sigurinë në SHBA, Evropë dhe në Lindjen e Mesme.
Trump: “NATO nuk ishte aty kur kishim nevojë”
Pas përfundimit të takimit, Donald Trump reagoi me një mesazh të ashpër, duke akuzuar NATO-n se nuk qëndroi në krah të Shteteve të Bashkuara kur ishte e nevojshme.
Në një postim në platformën Truth Social, ai shkroi se “NATO nuk ishte aty kur kishim nevojë dhe nuk do të jetë as nëse do të na duhet sërish”, duke bërë thirrje që kjo të mbahet mend.
Në të njëjtin mesazh, ai iu referua edhe Groenlandës, duke e përshkruar si një “pjesë të madhe akulli të keqmenaxhuar”.
Duhet theksuar se nga Shtëpia e Bardhë nuk pati një informim të menjëhershëm për përmbajtjen e takimit. Megjithatë, më herët zëdhënësja Karoline Leavitt kishte konfirmuar se mundësia e tërheqjes nga NATO ishte pjesë e agjendës së bisedimeve.
Lini një Përgjigje