FLASH
Shkruar nga Pamfleti
Protesta masive që u mbajt sot në sheshin Slavija në Beograd, nën sloganin “Ti dhe unë, Slavija”, ka përfunduar pa incidente, ndërsa qytetarët po shpërndahen gradualisht nga zona, raportoi televizioni N1.
Turmat në rrugët përreth Slavijës mbetën të dendura edhe pas përfundimit të protestës, duke ngadalësuar lëvizjen e qytetarëve. Arkivi i Tubimeve Publike e cilësoi protestën si një nga më masivet që nga fillimi i protestave studentore në Serbi.
Pak para përfundimit të tubimit, forca të shumta policore me pajisje për shpërndarjen e protestave u vendosën pranë Parkut Pionirski dhe ndërtesës së Pallatit të Vjetër. Në vendngjarje, kordoni policor u zgjerua në tre radhë, ndërsa efektivët u transportuan me autobusë drejt zonës përreth institucioneve shtetërore.
Raportohet gjithashtu se pranë Asamblesë Kombëtare ishte mbledhur një grup personash që shmangën kontaktin me mediat dhe më pas hynë në Parkun Pionirski. Një pjesë e personave që ndodheshin në zonën e rrethuar u larguan nga parku.
Gazetarët e mediave serbe raportuan për një pjesëmarrje shumë të madhe në Slavija, duke e krahasuar atmosferën me protestën e 15 marsit. Fjalimet nisën pak pas orës 18:00, ku studentët kërkuan plotësimin e kërkesave të tyre ndaj institucioneve.
Një studente deklaroi se kërkesat nuk janë vetëm të studentëve, por “të popullit rebel”. Në skenë foli edhe rektorja e Universitetit të Arteve, Mirjana Nikolić, e cila tha se “ata që mendojnë se janë zotërinj në këtë vend kanë frikë nga morali dhe kultura”.
Në protestë morën pjesë edhe veteranë ushtarakë, të cilët u pritën me duartrokitje nga turma. Një grup qytetarësh mbërriti në Slavija me një pankartë në nder të karikaturistit të ndjerë të gazetës Danas, Predrag Koraksić Koraks.
Sa i përket numrit të pjesëmarrësve, Arkivi i Tubimeve Publike deklaroi se protesta mund të jetë ndër më të mëdhatë studentore deri tani dhe paralajmëroi për “dezinformim dhe ulje të shifrave”.
Nga ana tjetër, drejtori i policisë serbe, Dragan Vasiljević, tha se në protestë morën pjesë rreth 34.300 persona.
Lini një Përgjigje