FLASH
Shkruar nga PamfletiAffinity Partners, mbështetësi kryesor i ofertës armiqësore nga Paramount, thuhet se tërhiqet pas shqyrtimit të rolit të Kushner.
Beteja për pronësinë e kompanisë Warner Bros Discovery nuk ka mbaruar ende, pasi firma e investimeve e Jared Kushner, Affinity Partners, nuk është më pjesë e ofertës së blerjes nga Paramount, konfirmon Variety.
Affinity Partners tha në një deklaratë për Bloomberg, i cili raportoi i pari lajmin tha se “Me dy konkurrentë të fortë që konkurrojnë për të siguruar të ardhmen e këtij aseti unik amerikan, Affinity ka vendosur të mos ecë përpara me këtë mundësi. Ne ende besojmë se ekziston një arsyetim i fortë strategjik për ofertën e Paramount”.
Paramount, e udhëhequr nga Kryetari dhe Drejtori Ekzekutiv David Ellison, nisi një përpjekje për të marrë përsipër të gjithë Warner Bros. Discovery, pasi Netflix tashmë kishte nënshkruar një marrëveshje prej 82.7 miliardë dollarësh me ta.
Oferta prej 30 mld dollarësh për aksion e Paramount Skydance për Warner Bros. Discovery, e cila arriti në total deri në 108.4 miliardë dollarë, u mbështet nga Affinity Partners, një firmë investimi e themeluar nga Kushner. Përveç kësaj, ofertat e fundit të Paramount mbështeten nga fondet sovrane të pasurisë së Arabisë Saudite, Katarit dhe Abu Dhabit.
Në komunikimet e mëparshme me ekipin e Paramount, bordi i drejtorëve të WBD shprehu shqetësimin se oferta e 1 dhjetorit e Paramount mund të shkaktojë një shqyrtim problematik të sigurisë kombëtare nga qeveria amerikane në lidhje me investitorët e huaj.
Paramount tha në një dokument të paraqitur javën e kaluar se tre fondet arabe dhe Affinity i Kushnerit “kanë rënë dakord të heqin dorë nga çdo e drejtë menaxhimi, përfshirë përfaqësimin në bord, të lidhur me aksionet e tyre pa të drejtë vote”.
Tani Affinity nuk është më pjesë e ofertës dhe kompania kineze e internetit Tencent, e cila më parë ofroi 1 miliard dollarë për ofertën e Paramount Skydance, nuk është më partner financimi për shkak të shqetësimeve të bordit të drejtorëve të WBD në lidhje me pronësinë e huaj.
Paramount, e kontrolluar nga familja miliardere Ellison, po përpiqet të fundosë një marrëveshje prej 82.7 miliardë dollarësh që WBD ka arritur për t’i shitur Netflix-it studiot e famshme të filmave Warner Bros, rrjetin prestigjioz kabllor HBO dhe shërbimin e transmetimit HBO Max.
WBD, e cila zotëron gjithashtu një sërë asetesh mediatike, përfshirë CNN dhe Discovery Channel, është zotuar se do ta “shqyrtojë dhe vlerësojë me kujdes” ofertën e pakërkuar të Paramount. Pritet që kompania të përgjigjet publikisht dhe t’i këshillojë aksionarët nëse duhet ta pranojnë apo ta refuzojnë ofertën, në ditët në vijim.
Një njoftim për shtyp që shpalli ofertën armiqësore të Paramount javën e kaluar tha se ajo do të mbështetej financiarisht nga familja Ellison dhe RedBird Capital, një firmë private equity. Por një depozitë rregullatore më vonë zbuloi financues të jashtëm, përfshirë Affinity, Fondin e Investimeve Publike të Arabisë Saudite dhe Autoritetin e Investimeve të Katarit.
Roli i Kushner kishte ngritur pikëpyetje. Trump e ka bërë të qartë se pret të jetë “i përfshirë” ndërsa rregullatorët federalë shqyrtojnë çdo marrëveshje për WBD.
Presidenti amerikan, ndërkohë, është përpjekur të distancohet nga Paramount dhe familja Ellison. Ai është parë më parë si i lidhur ngushtë me Larry Ellison, një nga njerëzit më të pasur në botë dhe babai i David Ellison, kryetar dhe drejtor ekzekutiv i Paramount Skydance.
Trump ka shprehur zhgënjim në javët e fundit për mënyrën se si është trajtuar nga CBS News, e cila është në pronësi të Paramount, dhe nga emisioni i saj “60 Minutes”.
“Për ata njerëz që mendojnë se jam i afërt me pronarët e rinj të CBS-it, ju lutem kuptoni se 60 Minutes më ka trajtuar shumë më keq që nga e ashtuquajtura ‘marrje nën kontroll’, sesa më kanë trajtuar ndonjëherë më parë,” shkroi presidenti në platformën e tij Truth Social të martën. “Nëse këta janë miq, do të doja të shihja si duken armiqtë e mi!”
Pse u trondit industrinë e filmit me këtë marrëveshje
Duket si një marrëveshje e thjeshtë bashkimi, por ka të gjitha përbërësit e një drame të Hollywood një pretendent të pasur dhe të fuqishëm, intrigë politike dhe plot momente tensioni.
Marrëveshja e Netflix-it për të blerë studion legjendare të filmave të Warner Brothers Discovery dhe rrjetet e njohura streaming të HBO-së, është një histori e vërtetë e një giganti pushtues. Por me rregullatorët dhe rivalët ende në pritje, kjo ka gjasa të jetë vetëm fillimi i sagës.
Netflix po bëhet edhe më i fuqishëm
Netflix ka vite që po e lë Hollywood-in pas, duke u renditur si shërbimi më i madh në botë me abonim streaming dhe prodhuesi më i madh i përmbajtjes së re në Kaliforni.
Por kjo marrëveshje – më e madhja në industri prej vitesh – do të konfirmonte pozicionin e tij në krye të tregut, duke i dhënë kompanisë një katalog me gati një shekull titujsh dhe duke forcuar kapacitetet e tij tashmë të fuqishme të prodhimit.
Për të mos përmendur fuqinë e saj të pastër të abonentëve, pasi Netflix po përgatitet t’i shtojë më shumë se 300 milionë abonentëve të vet edhe 128 milionë abonentët e HBO-së.
“Netflix është tashmë shërbimi më i madh streaming dhe tani, duke i shtuar HBO Max, bëhet praktikisht i paprekshëm,” tha Mike Proulx, zëvendëspresident në kompaninë kërkimore Forrester.
Marrëveshja do të bashkojë nën të njëjtën çati markat e dashura historike si Looney Tunes, Harry Potter dhe Friends, si dhe hitet e HBO-së si Succession, Sex and the City dhe Game of Thrones, me përmbajtjen më pak konvencionale të Netflix-it, përfshirë Stranger Things dhe KPop Demon Hunters. Blerja përfshin gjithashtu TNT Sports jashtë SHBA-së.
Mund të nënkuptojë rritje… ose ulje çmimesh
Netflix tha se shpreson ta përfundojë marrëveshjen brenda 12 deri në 18 muajt e ardhshëm.
Por drejtuesit janë të rezervuar për mënyrën ose nëse synojnë ta integrojnë Warner Brothers dhe markën kryesore HBO në shërbimin ekzistues të Netflix-it.
Bashkë-drejtuesi ekzekutiv i Netflix, Greg Peters, tha se emri HBO është “shumë i fuqishëm” dhe i jep kompanisë “shumë opsione”, por nuk dha më shumë detaje.
Netflix mund t’i paketojë filmat dhe programet në paketa të ndryshme, megjithëse analistët thonë se do të habiteshin nëse marka HBO do të zhdukej plotësisht.
Ndikimi në çmime është po ashtu i paqartë.
Dominimi i Netflix-it mund t’i lejojë të ngrejë tarifat. Por nëse shikuesit përfundojnë duke paguar për një shërbim të vetëm streaming, në vend të dyve, mund t’u kushtojë më pak.
Streaming është e ardhmja dhe Hollywood-i ndihet i lënë mënjanë
Warner Bros është një nga studiot që ka përcaktuar vetë Hollywood-in, duke krijuar klasikë si Casablanca, Gone with the Wind dhe The Exorcist.
Por ky blerje është një ilustrim i zbehjes së epokës së artë të kinemasë.Trajektorja është e qartë, tha z. Proulx i Forrester: e ardhmja është “krejtësisht streaming”.
“Me këtë marrëveshje është zyrtare: media tradicionale po mbaron.”
Netflix ka premtuar se do të vazhdojë të publikojë filma në kinema, një vendim që ka sens, pasi do të marrë markën e superheronjve DC, filma që performojnë shumë mirë në teatrot e kinemasë.
Por jo të gjithë besojnë se kjo do të mbetet prioritet.
Më herët këtë vit, bashkë-drejtuesi ekzekutiv Ted Sarandos tha se besonte se shkuarja në kinema ishte një “koncept i vjetruar”. Dhe ky konsolidim prek një nerv në një industri që tashmë po lufton me shkurtime vendesh pune, rënie të prodhimeve dhe kërcënimin e inteligjencës artificiale.
Regjisori i Titanic, James Cameron, ishte ndër shumë zëra në Hollywood që e pritën me zhgënjim marrëveshjen, duke paralajmëruar pak para njoftimit se mendonte se do të ishte një “katastrofë” për industrinë.
Donald Trump është një faktor tjetër i paparashikueshëm
Në sfond qëndron pyetja nëse Presidenti Donald Trump do të ndërhyjë. Kjo administratë ka premtuar qasje më të butë rregullatore kur vjen puna te bashkimet.
Por presidenti ka folur me superlativa për pronarët e Paramount Skydance, miliarderin e teknologjisë dhe donatorin republikan Larry Ellison dhe djalin e tij David, të cilët qëndrojnë pas ofertës rivale për Warner Bros. Dhe Trump gjithmonë ka shfaqur interes të madh për industrinë e medias dhe argëtimit.
Nuk ka koment nga rregullatorët e konkurrencës në SHBA, por një zyrtar i lartë i administratës Trump i tha CNBC-së se e sheh ofertën e Netflix-it për Warner Bros me “skepticizëm të rëndë”
Lini një Përgjigje