FLASH
Shkruar nga Pamfleti
Një përplasje e ashpër verbale shpërtheu sot në hapjen e konferencës së shqyrtimit të Traktatit për Mospërhapjen e Armëve Bërthamore (NPT) në selinë e OKB-së në New York.
Përplasja filloi pasi Irani u zgjodh si një nga 34 nënkryetarët e konferencës katër-javore. Irani ishte propozuar nga Lëvizja e të Paangazhuarve, që përfshin 121 vende. Delegacioni amerikan, i mbështetur nga Australia, Emiratet e Bashkuara Arabe, Mbretëria e Bashkuar, Franca dhe Gjermania, shprehu kundërshtim të fortë.
Përfaqësuesi i SHBA-së, emri i të cilit nuk u bë i ditur menjëherë, deklaroi se administrata Trump është “thellësisht e tronditur” që një vend si Irani, i cili ka treguar “përbuzje” ndaj traktatit, të marrë një pozicion kaq të rëndësishëm si nënkryetar.
Rusia nga ana tjetër kundërshtoi çdo përpjekje për të përjashtuar Iranin nga ky rol. Ambasadori iranian në OKB në Vjenë, Reza Najafi, e hodhi poshtë menjëherë deklaratën amerikane. Ai i quajti akuzat “të pabaza dhe të motivuara politikisht”.
Konferenca e NPT-së, që zgjat një muaj, pritet të jetë e tensionuar gjatë gjithë kohës për shkak të mosmarrëveshjeve të thella mbi programin bërthamor të Iranit.
Lini një Përgjigje