FLASH
Shkruar nga Pamfleti
Individët e pasur që mbeten në Lindjen e Mesme do të duhet të kërkojnë diku tjetër makinën e tyre të ardhshme sportive, pasi marka italiane e luksit Ferrari njoftoi se do të pezullojë dërgesat në rajon për shkak të luftës me Iranin.
“Ne po i monitorojmë nga afër zhvillimet në Lindjen e Mesme dhe implikimet e mundshme për biznesin tonë. Në këtë fazë, ne kemi pezulluar përkohësisht dërgesat në zonë, ndërsa po menaxhojmë disa dërgesa me aeroplan”, tha kompania në një deklaratë për Reuters.
Parku i njohur tematik Ferrari World, në Abu Dhabi, mbetet i hapur pavarësisht ndalimit të dërgesave të automjeteve.
Lufta e zgjeruar në Lindjen e Mesme, ka shkaktuar një ndikim të rëndë negativ në turizmin e shteteve të Gjirit, si Emiratet e Bashkuara Arabe, Katari, Arabia Saudite e të tjerë. Aeroportet kryesore si Dubai International, Hamad në Doha dhe Zayed në Abu Dhabi janë mbyllur pjesërisht ose kanë pasur ndërprerje masive fluturimesh, duke lënë qindra mijëra turistë të bllokuar dhe duke shkaktuar anulime të mëdha rezervimesh.
Perceptimi i sigurisë dhe stabilitetit, baza kryesore e turizmit luksoz dhe të lartë në këto vende, është dëmtuar seriozisht, me parashikime nga agjenci si Tourism Economics dhe Oxford Economics që flasin për rënie të vizitorëve ndërkombëtarë nga 11% deri në 27% gjatë vitit 2026, dhe humbje financiare që mund të arrijë deri në 56 miliardë dollarë vetëm nga shpenzimet turistike.
Kjo vjen pas një bumi rekord në 2025, ku rajoni tërhoqi rreth 100 milionë vizitorë, duke e bërë krizën aktuale një goditje të fortë për ekonomitë që kishin investuar miliarda në diversifikim larg naftës përmes turizmit.
Lini një Përgjigje