FLASH
Shkruar nga Pamfleti
Të paktën 56 trupa janë gjetur në varreza masive në veri të Meksikës, pranë kufirit me SHBA, njoftoi të shtunën zyra e prokurorit përgjegjëse për hetimin.
Trupat u gjetën në shtetin Chihuahua dhe u zhvarrosën ditët e fundit, me ndihmën e ushtrisë, tha zyra e prokurorisë lokale, pa specifikuar identitetin e viktimave.
Përgjithësisht dihet se në këtë rajon të Meksikës veprojnë organizata kriminale të përfshira në trafikun e drogës, armëve dhe emigrantëve.
Autoritetet deri më tani kanë gjetur trupa, skelete të tëra, eshtra individuale, gëzhoja dhe veshje. Eshtrat u dërguan në zyrën e mjekësisë ligjore për të përcaktuar se si dhe kur këta njerëz vdiqën.
Prokuroria u zotua të sigurojë mbrojtje ligjore për familjet e viktimave.
Varret ndodheshin në një vend të quajtur El Willi, i cili kontrollohet nga organizata kriminale La Linea , një nga degët e armatosura të kartelit Ciudad Juarez, sipas gazetës La Jornada.
Chihuahua është rrënuar prej vitesh nga dhuna e lidhur me krimin e organizuar, pasi shtrihet në një rrugë të trafikut të drogës dhe emigrantëve për në SHBA.
Më 26 dhjetor, të paktën 12 trupa u gjetën në varre rreth dy orë nga qyteti kufitar i Ciudad Juarez. Këtu deri në dhjetor 2024, u regjistruan 3,927 persona të zhdukur , shumë më pak në krahasim me shtetet e tjera ku operojnë kartelet, si Jalisco në perëndim dhe Tamaulipas në veri, ku të zhdukurit janë më shumë se 13,000 .
Në maj 2022, Meksika arriti numrin tragjik të më shumë se 100,000 të zhdukurve, bazuar në shifrat zyrtare, njoftoi OKB.
Lini një Përgjigje