FLASH
Shkruar nga Pamfleti"Wall Street Journal", duke cituar zyrtarë të lartë amerikanë, raportoi se administrata Trump është gjithnjë e më pesimiste për mundësinë e arritjes së një marrëveshjeje mbi programin bërthamor të Iranit.
Udhëheqësi Suprem i Iranit, Ajatollah Mojtaba Khamenei, në një mesazh me shkrim drejtuar popullit, deklaroi se hakmarrja për vrasjen e paraardhësit dhe babait të tij, Ali Khamenei, është një kërkesë e kombit iranian dhe se ajo "duhet të realizohet patjetër".
Sipas tij, Ali Khamenei u vra në muajin shkurt gjatë një sulmi të përbashkët të Izraelit dhe Shteteve të Bashkuara.
Në mesazhin e tij, Mojtaba Khamenei theksoi se synon të hakmerret për "gjakun e udhëheqësit martir dhe të gjithë martirëve të tjerë të rënë në këto luftëra të zhvilluara nga kriminelët".
Më herët, mediat iraniane raportuan se pritej publikimi i një mesazhi nga Udhëheqësi Suprem, i cili do të fokusohej në ceremonitë mortore dhe varrimin e ish-Udhëheqësit Suprem Ali Khamenei. Sipas agjencisë iraniane Tasnim, Ali Khamenei u vra në fillim të luftës së nisur nga SHBA-ja dhe Izraeli kundër Iranit më 28 shkurt dhe u varros të enjten në Mashhad.
Ndërkohë, një burim iranian i tha agjencisë "Fars" se nuk do të ketë negociata mes Iranit dhe Shteteve të Bashkuara derisa Uashingtoni të tërheqë qëndrimet e tij.
"Nuk do të ketë negociata derisa Amerika të rishikojë pozicionet e saj", deklaroi burimi.
Më parë, ministri i Jashtëm iranian, Abbas Araghchi, kishte deklaruar se Teherani "e ka mbajtur fjalën", ndërsa akuzoi administratën e presidentit Donald Trump, veçanërisht Departamentin Amerikan të Thesarit, për shkelje të pikës 9 të memorandumit të mirëkuptimit të nënshkruar në Islamabad, e cila parashikonte angazhimin e SHBA-së për të mos vendosur sanksione të reja dhe për të mos dislokuar forca shtesë ushtarake në rajon.
"Ky është vetëm një tjetër rast i shkeljeve dhe hapave të gabuar nga ana e SHBA-së. Realiteti është se mund të ketë vetëm përmbushje të ndërsjellë të angazhimeve", shkroi Araghchi.
Nga ana tjetër, CBS News raportoi, duke cituar burime zyrtare, se delegacionet amerikane dhe iraniane kanë mbërritur në Oman për të vazhduar negociatat përmes ndërmjetësve, pavarësisht përshkallëzimit të fundit të konfliktit që çoi në dështimin e armëpushimit.
Sipas CBS, delegacioni amerikan, i udhëhequr nga nënpresidenti JD Vance, sekretari i Shtetit Marco Rubio, i dërguari special Steve Witkoff dhe Jared Kushner, pritet të vazhdojë bisedimet me përfaqësuesit iranianë në Oman me udhëzim të presidentit Donald Trump. Në Oman ka mbërritur edhe ministri i Jashtëm iranian, Abbas Araghchi.
Ndërkohë, "Wall Street Journal", duke cituar zyrtarë të lartë amerikanë, raportoi se administrata Trump është gjithnjë e më pesimiste për mundësinë e arritjes së një marrëveshjeje mbi programin bërthamor të Iranit.
Sipas gazetës, një nga zyrtarët amerikanë ka deklaruar se Irani duhet të angazhohet që brenda ditës të konfirmojë se Ngushtica e Hormuzit do të mbetet e hapur për lundrim dhe se do të ndalojë sulmet ndaj anijeve, përndryshe do të përballet me pasoja të rënda. Megjithatë, zyrtarë të tjerë të cituar nga "Wall Street Journal" nuk kanë konfirmuar një afat të caktuar për këtë kërkesë.
Gazeta thekson se pesimizmi në rritje i administratës amerikane për një marrëveshje bërthamore përbën një pranim të rrallë se një nga objektivat kryesorë të politikës së jashtme të presidentit Donald Trump, kufizimi i programit bërthamor të Teheranit, mund të mos arrihet përmes negociatave.
Lini një Përgjigje