FLASH
Shkruar nga Pamfleti
Ukraina ka thënë se po kërkon të sqarojë detajet pasi Donald Trump njoftoi të hënën vonë se dërgesat e armëve amerikane do të rifillonin vetëm disa ditë pasi ato u ndaluan nga Pentagoni, duke theksuar se kishte nevojë për “parashikueshmëri” në furnizimet nga Uashingtoni.
Ministria e mbrojtjes në Kiev tha në një deklaratë të martën se nuk kishte marrë njoftim zyrtar për ndryshimin e politikës dhe se ishte “jashtëzakonisht e rëndësishme” që Ukraina të ruante “stabilitetin, vazhdimësinë dhe parashikueshmërinë” në furnizimin me armë, veçanërisht me sisteme të mbrojtjes ajrore.
“Ne jemi mirënjohës ndaj Shteteve të Bashkuara për gjithë mbështetjen e tyre dhe vlerësojmë shumë përpjekjet e partnerëve amerikanë që synojnë arritjen e paqes së vërtetë”, tha Ministri ukrainase e Mbrojtjes.
Duke folur në Shtëpinë e Bardhë të hënën, Trump tha se do të dërgonte “më shumë armë” në Ukrainë, duke shtuar se ishte “i zhgënjyer” nga presidenti i Rusisë, Vladimir Putin .
“Do t’u dërgojmë atyre më shumë armë që kemi. Ata duhet të jenë në gjendje të mbrojnë veten. Po goditen shumë rëndë tani”, tha Trump, së bashku me një delegacion amerikan dhe izraelit.
Komentet e tij erdhën pas një sulmi ajror shtatëorësh rus të enjten në mbrëmje në Kiev, disa orë pasi Trump dhe Putin folën në telefon. Të hënën, Trump tha se SHBA-të do të dërgonin kryesisht armë mbrojtëse.
Departamenti Amerikan i Mbrojtjes konfirmoi se "armë shtesë mbrojtëse" tani do të dërgohen në Ukrainë "me udhëzimin e Presidentit Trump". Kthesa 180 gradë vjen pas një telefonate të premten midis Trump dhe Volodymyr Zelenskyt, të cilën presidenti i Ukrainës e cilësoi si bisedën e tyre më të mirë deri më sot.
Ukrainës po i mbarojnë raketat interceptuese për sistemet e saj kundërajrore Patriot, të cilat luajnë një rol vendimtar në rrëzimin e raketave balistike ruse. Që nga janari dhe kthimi i Trump në Shtëpinë e Bardhë, Kremlini ka përshkallëzuar bombardimet e qyteteve ukrainase.
Në muajt e fundit, Zelensky është përpjekur të rregullojë marrëdhëniet e tij me Trump, pas takimit të tyre katastrofik në fund të shkurtit në Shtëpinë e Bardhë, kur zëvendëspresidenti, JD Vance, akuzoi udhëheqësin e Ukrainës për mosmirënjohje.
Të mërkurën, Zelensky do të marrë pjesë në një samit ndërkombëtar për ndihmë në Romë, i thirrur për të ndihmuar rimëkëmbjen e Ukrainës pas luftës. Sekretari i tij i mbrojtjes, Rustem Umerov, do të zhvillojë bisedime me gjeneralin Keith Kellogg, të dërguarin e Trump për Ukrainën, ku ka të ngjarë të diskutohet rifillimi i dërgesave amerikane.
Lini një Përgjigje